The Beatles 'Hey Jude' hla thu kutziak $910,000-in hralh
The Beatles bassist Paul McCartney-in 'Hey Jude' hla thu a kut ziak ngeia a ziahchhuahna chu Zirtawpni liam ta khan $910,000 laiin lilamnaah hralh a ni tih Julien’s Auctions chuan a tarlang.
'Hey Jude' hla thu ziahchhuahna hi an beisei aia a let kua laia toin an hralh a ni.
Hei bakah hian North American tour an neih hmasak ber, kum 1964-a an bass drumhead hman The Beatles’ logo chuanna chu $200,000 laiin an hralh bawk.
The Beatles band kehdarh aṭanga kum 50 a tlin champha hriatrengna atan Julien’s Auctions chuan Beatles memorabilia eng emaw zat a lilam a, thil chi hrang hrang 250 vel lai a lilam a ni. John Lennon leh a nupui Yoko Ono lem, Bagism tih chu $93,750-in an hralh bawk a, drummer Ringo Starr-in Abbey Road recording studio-a ashtray a hman chu $32,500-in an ti ral bawk a ni.
An lar hmaa Liverpool hmun pakhata an perform-na wooden stage chu $25,600-in an hralh thung.
Hey Jude' hla thu kutziak ngei hi hralh a nih hma hian Julien’s Auctions music specialist Jason Watkins chuan McCartney kutziak, kum 1968-a studio-a an record dawna a ziahchhuah chu thil hlu tak leh hmuh tur awm zen zen lo a nih thu a sawi. Mi zawng zawng hriat hla a ni tih sawiin, hla thu kuta ziahchhuah ngei chu a hla an record laia anmahni kaihruaitu atana an ziah chhuah a nih thu a sawi bawk a ni.
Hard Rock Cafe, Times Square, New York-ah bungruate hi zawrh a ni ṭhin a, online pawhin an zuar bawk ṭhin. Mahse tun ṭumah erawh chuan coronavirus hripui leng vangin online chauhin an lilam.