Matt Reeves-in 'The Batman' chan chhunzawm leh thuai duh
'The Batman' director Matt Reeves chuan coronavirus darh zel vanga production tih tawp hrih a nih hnuah chhunzawm leh thuai a duh thu sawiin, hripui leng a tawp veleh London-ah chan chhunzawm leh nghal a duh thu a sawi.
Matt Reeves hian hmun danga chan chhunzawm a nih dawn leh dawn loh chungchang erawh a sawi lang lo.
Robert Pattinson,Zoe Kravitz, Paul Dano leh Colin Farrell-te channa 'The Batman' film hi eng emaw chen chan tawh a ni a, UK-ah hian a film hmun lia ṭhena hmun khat vel chu an chang hman tawh nia ngaih a ni. Mahse production uluk taka an kalpui laklawh lai hian hripui a leng ta si a, thla hmasa khan tiam chin awm loin production chu an tawpsan rih tih an puang.
Deadline.com-in hripuiin a nghawng nasat lohna deuh rama chan chhunzawm a duh leh duh loh chungchang an zawhna chu chhangin, tunah chuan London-a let leh chu a ruahmanna a nih thu a sawi a, hmun danga chan a duh leh duh loh erawh a sawi lo a ni. Thutlukna siam tur chuan a la hma deuh nia a hriat thu a sawi bawk.
"Editing kan la ṭan lo a, mahse a film hmun lia ṭhena hmun khat vel chu kan chang hman tawh," tiin a sawi a ni.
'The Batman' project-a tha thawh hlawk tak, Andrew Jack chu tun hnai lawk khan Covid-19 vangin a thi a, Reeves chuan a ui thu sawiin mi ṭha tak leh mi bik tak a ni, a ti.