MZU Virthli kharna Runway Showdown-ah Urfi Javed

Mizoram University (MZU) event ngaihven hlawh tak, Virthli chu Zirtawpni liam ta zan khan Runway Showdown hmangin khar a ni ta. Show stopper-ah internet personality leh television actress Urfi Javed a rawn ṭang.

Kumin Runway Showdown-ah hian Mizo designer lar, Escape Engmawia kutchhuak mawi tak takte chu Mizo model-ten an rawn pho chhuak leh a ni. Escape Engmawia hi MZU nen Runway Showdown-ah kum thum an thawh dunna niin, kum 2018 leh 2022 ah show hi a lo buatsaih tawh a ni. Kum dangah pawh hian Indian model larte a lo chah chhuak tawh ṭhin, ram pawn lamah pawh show a lo buatsaih fo tawh bawk.

Zirtawpni zana Runway Showdown hi Zaii Hauchhum chuan a rawn hawng a, model-te ramp walk laiin Mimi Renthlei chuan 'Tunge Ruati i ngaihzawng' tih a rawn perform a, Ruatpuii bakah Dodoo Vangchhia an zai bawk a, thlirtute mit leh beng an ti tlai hle.