'Friends' reunion May-ah a thleng dawn ta lo
Matt LeBlanc chuan coronavirus hripui darh hma lawk khan May thlaah hian 'Friends' original cast member-te chuan reunion special show nei dawn tih lo sawi tawh mah se hri leng vangin an nei thei dawn ta lo.
'Friends' fan-ten an nghahhlelh em em, 'Friends' reunion special tur chu hripui leng a tawp veleh production neih chhunzawm a ngai dawn ta zawk a ni.
Jennifer Aniston, Courteney Cox, Lisa Kudrow, Matt LeBlanc, Matthew Perry leh David Schwimmer-te chu 'Friends' comeback nei tur hian an inpeih tawh hle a, HBO Max show streaming service May thlaa tlangzarh a nih rualin an special reunion show hi tih chhuah ve nghal an tum a, mahse hripui leng vang hian an thei dawn ta lo a ni.
'Friends' hi American sitcom television series a ni a, September 22, 1994 aṭanga May 6, 2004 thleng khan NBC-ah pek chhuah niin season 10 lai an siam hman.
Tih chhuah a nih lai leh vawiin thleng pawh hian khawvel hmun hrang hrangah fan an la ngah hle a, chawimawina pawh a dawng hnem hman hle.