Hyderabad-ah Miss World inelna nei dawn

Miss World 2025 beauty pageant vawi 72-na chu May 7-31 chhungin Hyderabad-ah neih a ni dawn. Ram 140 aṭangin contestant an tel dawn tih state tourism minister Jupally Krishna Rao chuan a sawi.

Inelnaa tel turte hi May 6 leh 7-ah Hyderabad an thleng dawn a, May 31-ah Hitex-a grand finale neih hmain inelna hrang hrang an nei ang. May 10 hian Gachibowli Indoor Stadium-ah grand opening ceremony neih a ni dawn. Miss World Sports Finale hi May 17-ah Gachibowli Indoor Stadium-ah neih a ni dawn a, Continental finale chu continental group chhunga contestant-te judge-na tur niin, May 20 leh 21-ah T-Hub-ah neih a ni ang. Miss World Talent Finale chu May 22-ah Shilpakala Vedika-ah neih a ni ang a, May 23 hian ISB-ah head-to-head challenge final neih a ni ang. May 24-ah Hitex-ah Miss World Top Model leh Fashion Finale neih a ni leh dawn a, May 25-ah jewelry leh pearl show neiin Miss World 2025 Grand Finale chu May 31-ah Hitex-ah neih a ni dawn a ni.