Mimi Renthlei A zai thiamna a la danglam lo

Hun eng emaw chen a music video kan hmu tawh lo a, pasal a neih hnu hian music video lam a ngaihtuah hman tawh meuh lo a, ngawih reng erawh a tum lo tih a sawina rei ve leh tawh mah se, Mimi Renthlei hi kan beisei aiin a rawn lang har. Kumin chu a ngawi tlang leh mai anga kan tih laiin music video thar a rawn tichhuak ta.

A music video kan hmuh hnuhnun ber chu kum 2010-ah daih tawh khan a ni a, 'A her leh si' tih hla kha a ni. Hemi hnu hian a Rangoon an zin ṭuma mi, 'Ka ngai ngam lo' tih hla chu MDM Library-ah dahin, kum 2013 khan Ṭhazual chart-ah pawh Top 10-ah a lang pha a nih kha. Khami hnu khan Mimi Renthlei hi a reh vang vang a, Mizo Idol judge-ah kan hmu. Mizo Idol 2015 neih lai khan music chawlhsan a la tum loh thu a sawi a, a remchan ve lehah music video pawh siam a tum thu a sawi a ni. Mahse pasal a neih tawh avangin thil tih a harsa ve hle tawh a ni a ti bawk. Kum 2015 kan hmang liam a, Mimi Renthlei kan la hmu lo, 2016 kan chuan kai a, Favang kan han luh meuh chuan music video thar nen ‚wllÍn min hmanpui dawn ta.

Mimi Renthlei music video hi 'Hrilh an ka mawi si lo' tih hla a ni. He hla hi Sangtea phuah a ni a, Blue Wave Records-a record a ni. A teaser hi YouTube-ah dah chhuah a ni tawh. Mimi Renthlei music video thar hi MDM library-ah dah a ni tawh a, TV lamah pawh kan hmu nghal deuh thuai ang.

Mimi hian music video chauh a buaipui lo a, album pawh a buaipui mek. Album hming tur hi 'Run rem ang aw' tih a ni a, hla 13 a awm dawn. October chawlhkar hnihna velah hian tihchhuah a tum. He album-a music-te hi PB Lianhminga, BZA of Blue Waves, Ephraim leh Lawma te siam a ni.