Fashion Fiesta

Nikum September thlaa New York fashion runway show-ah khan designer label lian Proenza Schouler leh Prabal Gurung te collection zingah chuan Rent The Runway-a vice president Tam-a mit la deuh riau bik a awm a, an customer hlun te leh an dawra thawmhnaw rawn hawh ṭhinte hnenah chuan off-shoulder hi nakkum lamah chuan kan uar hle dawn a nih hi a ti a. Tam chuan thawmhnaw, a hlawma siam ṭhintu Tibi label hnuaiah chuan kumin kum tir lam khan top 12 leh kawrfual 12 leh jumpsuit 5 off-shoulder design vek chu leiin an dawrah hian mipui hawh chhuah theih turin an phochhuak a, pahnih khat phochhuak mai lovin mannequin 12 chuang an dawr tukverha an tarah chuan off-shoulder hak dan chi hrang hrang a pho chhuak a. A tirah chuan mite mit la lutuk lem lo mah se an Instagram account-a Katy Perry-i'n MSGM off-shoulder thawmhnaw mit la tak mai a hak chu pho langin, hemi hnu lam hi chu sawi loh a leng, mi tin mai hian kan duh ta ni berin a lang. A hmaa a lo sawi tawh ang ngeiin kumin chhung hian a hit satliah mai lo, a tu a te pawh hian inbel kan tum ni awm tak a ni. Katy Perry-i'n a rawn hak chhuah hnu phei hi chuan Rent The Runway-ah hian heng lam hawi thawmhnaw hi booking a tam lutuk avangin piece 12 lek aṭang khan 75 lai maiah kai chhoin heng thawmhnaw ho hi engtik lai pawh a hawh chhuah reng ang an ni.

Kum 1800 chho aṭang khan he trend hi chuan min luh chhuah zeuh zeuh a, kumin Spring 2016 runway bikah chuan a tam zawkah thawmhnaw var lampangah hmuh a ni a, kum liam tate thlirlet chuan actress lar Brigitte Bardot, sexy em em mai khan 1960 chhoa a thawmhnaw hak apiang mil tura off-shoulder a rawn inthuam ṭhin chuan mite mit a la hle a, he trend ngei pawh hi a rawn tilar lehzual anih kha. Pawnfen chhing emaw kekawr tlawn nen pawhin a inhmeh theih zel vangte pawh a ni ang e. Heng hunlai hian an uar hle reng anih kha. Kum 2015 kum tawp kan thlen chhoh meuh chuan Katy Perry te leh Kerry Washington ten kawrfual dum arh hnilh hnelh, tlema dar lang an rawn inbel a; Cannes Film Festival han en let ila, lemchang thiam lar Julia Roberts leh Lily Rose Depp te chuan an dar, a mawi tawk leka an rawn phochhuah meuh chuan khawvelin he trend hi kan entawnin kan um zui ve ta zel zawng a ni e.

Vawiin niah chuan thawmhnaw chhing a ni emaw gown leh mo kawr chenin a dar lam lang tam thei ang ber kan uar ta hle a ni. He trend hian engtia rei nge min awmchilh dawn erawh kan hre lo. Amaherawhchu, tunah hrih hi chuan kan ṭhalai naupang zawk ten an denim kekawr nen, crop top pian ang ni siin, dar lang haihin khawlai an leng ngam tawh a. Tlema rual u zawk ten dar lang hlawk an ha ngam ve lo deuh anih pawhin a dar infual hleih deuh talin, dar lehlam chauh an ti lang. Chutah he trend ngaina ve si, a lawnga ha chiah ngam lo te chuan taksa lang ang taka lang turin taksa rawng, net te hmangin chawlhni kawr thlengin heng design hian min run mek reng a ni.

Veng ṭhenkhatah te tlema fashion lama kei ka ni inti ten chawlhniah hian an inbel ngam tawh a, amaherawhchu a tlangpuiin ṭhalai zual deuhte tih ‚wm tawka ngaih a ni tlangpui. Chutih rualin veng ṭhenkhatah erawh kan la pawm lutuk lem lo. Chutah tak chuan a ni Zorama kan designer te chhuanawmzia kan hmuhchhuah tak chu. He style leh design hi Zoram Kristian ram inti ah chuan mi nawlpui mit a ti kham dawn tih hriain, puipun nikhuaa hak tur chiah reng reng net an vuah ta zel a, a sexy lutuk tur leh, a ngial a ngana taksa lang lutuk tur a khuh bakah a timawi phian a, chuvangin kan ram chhung ngeiah pawh mi tam zawkin kan inbel theih phah ta a ni. He style
ṭhatna riau chu crop top te angin dul lam venthawn vak tur a awm lova, tlema dul kiar leh thau tan pawh a him tihna a nih chu. Peplum te anga arh lih leih anih lem loh avang pawh hian mitinin kan inhmeh thei mai. Sawi tawh ang khan top a ni emaw jumpsuit emaw kawrfual emaw a inhmeh theih vekna hi he style ṭhat ve na riau chu a ni.

Zoram chhunga designer kei ka ni inti chin tawh te kutchhuak en chuan heng design hi kan hmu deuh zel a, kumin chhung chuan kan uar chho zel dawn ni pawhin a lang. Sawi tak ang khan a langsar lutuka kan ha ngam ve lo anih pawhin he trend nena kal rem tak pakhat ban bul tlem lang te emaw, dar zawn tlem lai tihkuaka han tihlan zeuh te kha mit a kham lovin a mawi tawk viau tho a ni.

Tluangpuii Hmar

Instructress

Vakiria Institute of Fashion Technology