Box office-ah beisei loh zawk!

Movie thar ṭhahnem tak kar liam ta chhung khan US-ah chhuah a ni a, chung zingah chuan besei zawkin sum a lalut hnem ber lo a, beisei loh zawkin sum a lalut hnem ber.

Kar liam taa movie tihchhuah zinga mi tam takin sum lalut hnem ber tura an ngaih chu Deepwater Horizon a ni. Mahse kar a tawp a, kar thar a rawn chhuah a, sum lakluh zat an han chhut chuan Deepwater Horizon aiin Miss Peregrine's Home for Peculiar Children chuan sum a lalut hnem zawk.

Miss Peregrine film hian kar tawp chhung khan USD mtd 28.5 a lalut. He film hi fantasy film a ni a, Jake chu a puin a thihsan hmain, khawvel danglam tak kal theihna tur eng emaw a hrilh hman. Jake hian a pu hrilh aṭang chuan chu khawvelah chuan a lut a, Miss Peregrine's School for Peculiar Children a lo awm reng a, chu hmunah thil danglam leh harsatna vel he film-ah hian tarlan a ni.

Mark Wahlberg channa, Deepwater Horizon hi mi tam tak chuan a hlawhtlin hle an ring a, box office aṭanga sum lakluhah pawh a lalut hnem ber tura an ngaih a ni. Mahse Miss Peregrine's Home for Peculiar Children a tluk tlat lo. Kar tawp chhung khan Deepwater Horizon hian USD mtd 20.6 a lalut. Deepwater Horizon hi chhiatna thleng tak tak chanchin behchhan a ni. Kum 2010-a Gulf of Mexico tuipui hnuaia tuialhthei verh chhuak tura an beihnaa chhiatna thleng chanchin a ni. A siamtute chuan he film hi tun aia a ropui zawk an rin thu an sawi a, amaherawhchu tunah hian box office-ah pakhatna hauh nghal lo mah se, box office-a lang rei tur chi film nia an hriat thu an sawi.

Box office movie

"Miss Peregrine" - $mtd 28.5

"Deepwater Horizon" - $mtd 20.6

"The Magnificent 7" - $mtd 15.7

"Storks" - $mtd 13.8

"Sully" - $mtd 8.4

"Masterminds" - $mtd 6.6

"Queen of Katwe" - $mtd 2.6

"Don't Breathe" - $mtd 2.4

"Bridget Jones's Baby" - $mtd 2.3

"Snowden" - $mtd 2