Malaika Arora lakah bailable warrant ti chhuak

Mumbai magistrate court chuan Bollywood actor, Malaika Arora lakah kum 2012-a restaurant-a kut inthlak kaihhnawihah Thawhṭanni khan bailable warrant a ti chhuak. He buainaah hian Saif Ali Khan pawh a inhamhnawih a ni.

Kum 2012, February 22 khan South Mumbai-a restaurant-ah Saif Ali Khan, Malaika Arora, Kareena Kapoor, Karisma Kapoor, Amrita Arora leh an ṭhian dangte zanriah an ei ho a, an bulah hian NRI business man Iqbal Sharma leh a chhungte an awm ve bawk. Saif Ali Khan-te ho hi an thawm a bengchhen deuh avangin Sharma hian ṭawng zawi deuh turin a ngen a, an inhnial buai zui ta a ni. Sharma chuan Khan hian a hnarah a hnek niin a sawi a, hei bakah a puzawn pawh nawmnah takin an ṭawngkhum niin a puh bawk. Colaba police station ah thubuai ziah luh a ni a, thubuai ngaihtuahnaah hian thuhretu atana koh, Malaika Arora hi court-ah a inlan loh avangin bailable warrant hi tihchhuah a ni ta a ni. Thubuai hi April 29 ah ngaihtuah leh a ni ang.