Kum 10 liam ta chhunga UK-a hla play hlawh ber Pharrell Williams 'Happy'

Adele leh Bruno Mars-te hla pathum ve ve a lang phak a, hei hian heng artist pahnihte hi UK-ah an tla na hle tih a tilang chiang awm e.

Heng hla 40-te hi  radio producer leh broadcaster-te'n kum 10 liam ta chhunga an play nasat zualte a ni tih PPL hotupa Peter Leathem chuan a sawi.

BBC Radio 2 head of music Jeff Smith chuan UK-a hla play hlawh zual 40 zingah hian mipa an tam zawk tih sawiin, 22 an awm laiin hmeichhia 14 an awm thung. American zaithiam 18 an awm laiin an ram mi, UK artist chu 14 chiah an awm thung a ni.

Rihanna, Coldplay, Lady Gaga leh Katy Perry-te pawh top 40-ah hian an lang a, mahse top 10-ah erawh an lang phak lo.

Pharrell Williams 'Happy' hi kum 2013-a tlangzarh kha niin computer animated film 'Despicable Me 2' soundtrack atan a tirah chuan tlangzarh a ni.

A studio album pahnihna 'Girl' ami a ni a, tih chhuah a nih hun lai khan a lar hle a, United States, United Kingdom, Canada, Ireland, New Zealand leh ram dang 19 laiah Chart-ah No.1 a hauh hial.

Kum 2014 khan US-ah chuan hla hralh kal ber a ni a, copy maktaduai 6.45 lai hralh a ni a, UK-ah pawh copy maktaduai 1.5 hralh a ni bawk. Hemi kumah vek hian UK-ah chuan hla download tam ber a ni zui a, an ram history-a hla hralh kal ber pariatna record a siam zui bawk a ni.

57th Annual Grammy Awards-ah khan Grammy Award for Best Music Video a dawng a, Billboard chart-ahte pawh No.1 a ni zak zak tawh ṭhin.

Adele-i'n studio album pahnihna '21'-a a dah 'Rolling In The Deep' hi kum 2010-a tlangzarh kha a ni a, tih chhuah a nih hnu lawkah khan ram 11 chart-ah No.1 a ni thei a, Billboard Chart hrang hrangah No.1 a nih bakah US-ah a hralh ṭha hle.

US-ah bik hian 'Happy' ai pawh hian hralh a kal a, copy maktaduai 8.7 lai a hralh. Grammy pathum  a dawng a, kum 2012 Grammy semnaah khan Record of the Year, Song of the Year leh Best Short Form Music Video award-te a dawng a ni.

Adele hi English singer zingah chuan kum 10 liam ta chhunga UK-a play hlawh ber a ni tihna a ni a, Pharrell Williams 'Happy' hi a tluk zo ta lo a ni.

Kum 2011-a tlangzarh Maroon 5 ft. Christina Aguilera 'Moves Like Jagger' lar zia sawi nawn a ngai lo a, UK-a TV leh radio-ahte chuan kum 10 liam ta chhung khan hla play hlawh ber pathumna a ni.

He 'disco' leh 'electropop' hla hi Billboard Hot 100-ah No.1-te pawh a lo ni tawh ṭhin a, kar 10 chhung lai top 3-ah a lang bawk. 

Maroon 5 studio album pathumna 'Hands All Over' ami a ni a,  Adam Levine, Ammar Malik, Benjamin Levin leh Shellback-te'n an phuah ho a ni.

Palina chu Daft Punk ft. Pharrell Williams and Nile Rodgers 'Get Lucky' a ni a, he hla pawh hi a lar hle a, tlangzarh a nih aṭanga ni 69 lek chhungin khawvel ram tam tak music chart-ah No.1 a ni thei.

Justin Timberlake 'Can't Stop The Feeling! chu pangana niin, kum 2016-a a tlangzarh chauh mah ni se kum 10 liam ta chhunga UK-a hla play tam ber pangana a ni hman a, an play tam tur zia chu ngaihtuah tham a ni. 

'I Gotta Feeling' Black Eyed Peas chu parukna a ni a, 'Uptown Funk' Mark Ronson, ft Bruno Mars chu pasarihna niin One Republic hla hit 'Counting Stars' chu pariatna a ni bawk.

CeeLo Green 'Forget You' chu pakuana a ni a, Kings Of Leon hla 'Sex On Fire' chuan top 10 a khar a ni.