Synod Choir-in 'Lei in' music video ti chhuak

'Lei in' hi Synod Choir album kumin KṬP General Conference-a tlangzarh tak 'Pathian Hmangaihna' tiha mi kha a ni a,  Synod Choir conductor T. Laldintluanga lehlin niin; CTJ Recording Studio-ah audio record a ni a, video hi RDS Shots kut chhuak a ni thung.

T. Laldintluanga hian Scooter Simmons leh Jay Rouse-te hla 'Temporary home' a lehlin a ni a, "He khawvelah hian chawlhna zawngin kan tlan a, hlim ve viaua kan inhriat lai hian a tawpah vakvaiin kawng dik loahte kan peng leh ṭhin. A chhan chu he khawvel hi kan kumhlunna tur a ni lo a, sual vangin kan rum mek a, kan rum zel dawn a ni. He khawvel hi kan in nghet a nih loh zia leh vanah in nuam zawk Lalpan min buatsaih sak a ni tiin he lei hi chu kan in lem, kan lo chen lailawk na mai mai tur a ni," tih hi leiin hlain sawi a tum ber a nih thu Laldintluanga chuan Vanglaini a hrilh.

Kan tunlai boruak nen pawha inmil tak hla nia a hriat thu sawi bawkin, "Khawvel pum chu hri te reuh te, mit lawng pawha hmuh theih loh avangin kan buai a, kan chiai mek a, khawvel hi chu kan khualzinna ram a ni a; kan chawlh hlenna tur in tak chu vanram a ni," tiin he hla chungchang hi a sawi a ni.

Mizoram synod choir 2018-2020 term hi a tawp a hun dawn tawh a, lockdown vang hian a tawp zui mai thei a, extend pawh a la ni thut thei bawk.