Canadian rawlthar zaithiam a hlawhtling Mendes album pakhatna

Billboard 200-ah Shawn Mendes chu tuma tluk rual lohin pakhatna a luah. Pahnihnaa awm, Drake nena album an hralh zat inthlauhna hi nuai khat a tling ṭep.

Shawn Mendes hian a album 'Illuminate' chu copy 145,000 zet a hralh a, heng zinga copy 121,000 chu album pangngai a ni a, a bak hi chu album tlukpui a ni. Amah hi Canadian tho a ni a, tunhnaiah Billboard album chart lamah Canada zaithiamte an ropui hle. Drake pawh hi Canada mi a ni.

Kum 18 mi chauh Shawn Mendes hi kum naupang tak ni chunga album a tihchhuah hmasa pahnih Billboard album chart-a pakhatna luah thei ve ve mi panga zingah a tel ta. Kum 2011 khan Justin Bieber chuan kum 17 mi lek ni chungin album chart-a pakhatna a vawi hnih nan a luah a, kum 2007 khan Miley Cyrus chuan kum 14 mi chauh niin a lo ti thei tawh a, Hilary Duff-i'n kum 2005 khan kum 17 mi niin he hlawhtlinna hi a lo chang tawh a, LeAnn Rimes pawhin kum 1997 khan a lo ti thei tawh bawk.

Drake-a album 'Views' chu pakhatnaa a rawn lawn chhuah leh hnuah pahnihnaah a chhuk. Canadian rapper album hi kar liam ta chhung khan copy 50,000 an hralh. He album hian Billboard album chart-ah hian pakhatna ṭum 13, a zawn vek loin a lo luah tawh a ni.

Suicide Squad movie chu box office lamah a langsar zingah awm tawh lo mah se, album chart lamah chuan a langsar zingah a la awm thei fo. Suicide Squad soundtrack hi kar liam ta chhung khan copy 42,000 hralh belh leh a ni a, pathumna a rawn luah thei.

Billboard 200

"Illuminate" - Shawn Mendes (145,000)

"Views" - Drake (50,000)

"Suicide Squad: The Album" - Various Artists (42,000)

"Farm Tour...Here's to the Farmer" - Luke Bryan (34,000)

"Chapter and Verse" - Bruce Springsteen (29,000)

"Birds in the Trap Sing McKnight" - Travis Scott (II) (27,000)

"Blurryface" - Twenty One Pilots (26,000)

"They Don't Know" - Jason Aldean (24,000)

"Anti" - Rihanna (23,000)