Kim K an khawngaih vak lo! Inrawkna kha ama ruahmanah an ngai

Pathianni zana Paris-a Kim Kardashian rawk a nih chungchangah, social media lamah chuan Kim Kardashian hi mi zawng zawngin an lo khawngaih vek lo a, mi tam tak chuan amah an tuarpui lem lo. Kha inrawkna pawh kha a vanduaina tawh ai mahin amah Kim K-i'n a ruahman ni zawk ‚wm hialin an sawi.

Pathianni zana inrawknaah khan Kim Kardashian-i tlereuh, USD mtd 11 hu zet an ruksak a ni. Hemi thu social media-a kal zelah, Kim K hian kha inrawkna kha a phuahchawp, a ruahman niin an sawi a, insurance scam a ni ang em tihte an sawi. Mi tam tak chuan hetiang zat zat tlereuh a keng hi mak an tih thu a sawi bawk. Twitter lamah chuan USD mtd 11 (a ṭhen chuan mtd 10 an ti a, chanchinbu
ṭhenkhat dangah chuan USD mtd 6.7 an ti bawk) zet bo anga a sawi hi, insurance company lama pawisa a claim theih nan a ni ang an ti.

Kim Kardashian hian lem a chang a, mipui bumna thil mai mai a ti nia ngai an tam hle. Social media tam takah chuan Kim K-i rawk a nih thu hi lemchan a ni tiin rawn phawrh chhuak leh mah se mak ka ti lo ang ti an awm nawk. An rinhlelhna chhan tam tak zingah, Paris-a a thlenna hotel hming sawi tur awm miah lote pawh hi a tel.

Kim K hian a sawi dan chuan Paris-a a thlenna hotel-ah police lema inthuamten silaia tinin an rawk a ni a ti. Mi panga an ni a, bual pindanah an kalh khum a ni a ti bawk. Mi tam tak chuan bual pindan hi pawn lam aṭanga kalh hnan theih a ni lo an ti bawk.