‘Naruto’ Franchise-in Indian Market nen Theatrical deal siam

India ram puma anime ngainatute tana thu lawmawm, Reliance Entertainment chuan Japan TV Tokyo leh Happening 365 te nen inremna siamin, “Naruto” film franchise chu ram pum theatre-ah an rawn pholang dawn. He theatrical tih chhuah hmasa ber tur chu “Naruto the Movie: Ninja Clash in the Land of Snow” niin, June thlaah a chhuak ang.

He thawhdunna hian “Naruto” franchise chu khawvel pum huapa huang a zauhna a ni a, Japanese network TV Tokyo chuan Indian theatrical-a a tihchhuah chu hmasawnna kawng pawimawh tak a nih thu a sawi.

TV Tokyo Global Distribution hotu Hiroaki Saiki chuan, “Movie-te hi ṭawng pathum - English, Hindi, leh Japanese-a tihchhuah a ni dawn a, entu hrang hrangte tan a hlawk thlak hle dawn a ni," tiin a sawi a, ‘Naruto’ ngainatute tan chauh ni loin anime fan-te tan thu lawmawm tak a nih thu a sawi bawk. India ramah anime ngainatu an pun nasat thu Reliance Entertainment-a international business leh syndication hotu Dhruv Sinha chuan sawiin, Naruto franchise nen an thawk dun thei chu a lawm thu a sawi ve bawk.

Company chuan thla leh lamah release schedule leh brand partnership chungchang chipchiar zawka puan an tum.