Ralph Lauren-in hmai tuamna leh gown siam
Designer brand Ralph Lauren chu coronavirus dona an thlawpna lantirna turin an penchhuak ve leh ta a, medical masks leh gown siam lamah hma an la ṭan tih an puang.
Ralph Lauren hian Ningani aṭang khan hmai tuamna leh invenna kawrfual siam hna hi an ṭan tawh tih an puang a, Ralph Lauren Corporate Foundation chuan hmai tuamna 250,000 leh isolation gown 25,000, US-a hman turin an siam phawt dawn a ni.
Ralph Lauren Corporate Foundation hian invenna hmanrua an siam chhuah hi an duhtawk mai lo a, khawvel puma Covid-19 dona kawnga hmalatute tan US dollar maktaduai 10 an pek dawn thu an puang bawk.
Company executive chairman leh brand hming chawi chhan ber Ralph Lauren chuan, "Kan company lairil takah hian inpumkhatna a awm reng a, chu chuan kan thil siam chhuah, kan inrintawkna leh a pawimawb ber, kan inṭanpui tawnnaah rah ṭha tak a chhuah a ni, Kar liam ta a ni emaw, thla liam ta emaw pawh nise chu rilru kan neih chu a bo ngai lo," tiin an company-in ṭanpui hna an thawh theih chhan a sawi.
Ralph Lauren bakah hian brand dag lar tak tak pawhin helam kawngah hian hma lak an tum thu an puang ve bawk a, chung zingah chuan
Luxury coat brand Canada Goose leh Gap-te pawh an tel. Tunthla tirah khan Louis Vuitton brand neitu LVMH lam pawhin France-ah hand sanitizer an siam dawn tih an lo puang ve tawh bawk.
Ralph Lauren
Ralph Lauren hi kum 80 lai a ni tawh a, Ralph Lauren Corporation chairman niin nikum chhung khan US Dollar tluklehdingawn 6.3 vel nei anga chhut a ni.
America mi hausa 102-na niin Forbes chuan a chhut a, kum 53 liam ta, kum 1967-ah khan Ralph Lauren Corporation hi a din a; New York-ah hmunpui an nei a ni.