Box Office-ah Minecraft Movie che ṭha tluang zel

North American Box Office-ah kar liam ta khan 'A Minecraft Movie' in sum la lut hnem berin hma a hruai chhunzawm zel. Minecraft movie hi PG video game adaptation niin theater-a pek chhuah a nih aṭangin a hit nghal hle. Kumin chhunga film chhuak tawha sum la lut hnem ber dinhmun hauh pha nghalin 'Captain America: Brave New World' chu a rawn khum der tawh.

'A Minecraft Movie' ah hian Jason Momoa leh Jack Black-te an chang dun a, an ti hmuhnawm zual leh hle bawk. Tih chhuah a nih aṭangin khawvel huapah ni 10 chhungin USD mtd 550 a la lut tawh a, kar hmasa chhung khan USD mtd 80 a lak luh belh leh bawk. Tlangzarh karah khan USD mtd 162.7 a la lut thei a ni.

Pahnihnaah hian animated faith-based, chhungkua pawha en theih chi "The King of Kings', Isua chanchin tarlanna chu rawn langin USD mtd 19 a la lut a, CinemaScore-ah 'A+' hmuin, theater 3,200-ah pek chhuah a ni. Pathumnaah hian thriller movie "Amateur" awmin, theater 3,400 aṭanga pek chhuah niin USD mtd 15 a hmuchhuak tawh.

USD mtd 20 senga siam, 'Warfare' movie chuan USD mtd 8.3 la lutin palina a rawn hauh pha bawk a, combat thriller lam niin a debut karah hian a che ṭha pangngai hle. Universal leh Blumhouse kut chhuak horror film 'Drop' chuan USD mtd 7.7 cinema 3,085 aṭanga la lutin top 5 a rawn khar a ni.

Kar liam ta chhunga sum la lut tam zual film zingah hian 'The Chosen: Last Supper', Part 3 leh 2, 'A Working Man', Snow White', 'The Woman in The Yard' te an rawn lang thei bawk.