Nobel Peace Prize Colombian president-in a dawng

Khawvelin a ngaihhlut leh a ngaih ropui em em, Nobel Peace Prize chu nimin khan puan a ni a, a dawngtu hi Colombia ram president, Juan Manuel Santos a ni.

Juan Manuel Santos hian Colombia rama FARC leh sorkar kum 40 chuang inbeihna a tawp theih nan president a nih hnuah hma a la nasa hle. Inbiakna thui tak an nei tawh a, inremna pawh an peih lek lek tawh tihin, inremna tur thuthlung ruahman ṭhenkhat chu Colombia mipuiin an duh loh avangin Colombia rama muanna a awm theihna tura a hmalakna chu a khaihlak rih a ni.

Kum 2010 aṭanga Colombia pre≠si≠dent ni ṭan, Juan Manuel Santos hi Colombia mi, Nobel prize dawng pahnihna a ni a, kum 1982 khan Gabriel Garcia Marquez chuan Nobel Prize in Literature a lo dawng tawh a ni. Ram hruaitu ni lai (lu ber ni chuang lo), Nobel prize dawng thei 26-na a ni bawk.

Santos hian kum 2010-a president a nih aṭang khan Revolutionary Armed Forces of Colombia (Spanish: Fuerzas Armadas Revolucionarias de Colombia - FARC) nena inremna a awm theih nan hma a la nghal. FARC hian kum 1964 aṭang khan Colombia ramah communist rorelna a awm theih nan silai kengin an bei ṭan a, Colombia ram pawhin FARC leh sipai inbeihna hi an tuar nasa hle. Santos hian remna leh muanna a awm theih nan hma a la a, "Thuneihna ka chan chhung chu theihtawp ka chhuah zel ang," a ti.

Kum 1901-a Nobel Peace Prize sem a nih aṭang khan mi 97 ten he chawimawina ropui hi an lo dawng tawh a, heng zinga 16 hi hmeichhia an ni. Dawngtu zinga mi 15 te chu ram khat hotu lu ber an ni. Nobel Peace Prize dawng tura thlan, Le Duc Tho chuan a dawng duh lo a, he chawimawina hlan an tum zinga hnar awm chhun a la ni. Le Duc Tho hi Vietnam mi a ni a, kum 1973-a Nobel Peace Prize dawng tura thlan a nihin a dawng duh lo a ni.