Coffee Nite vawi 21-na nizanah hmang
Salvation Army Youth, Aizawl Temple Corps chuan kumtina an buatsaih ṭhin angin nizan, Krismas Urlawk zanah khan Coffee Nite 2020 an buatsaih leh a, he hunah hian Health and Family Welfare Minister Dr R Lalthangliana chu Father of the Night a ni.
Hripui a len miau avangin kumdang angin charity concert lian tham tak buatsaih theih a ni lo a, sorkarin Covid-19 inkaihhruaina dan a siam zawm a ṭul avangin kumin Coffee Nite hi Aizawl Temple Corps YP Hall-ah buatsaih a ni a, zan dar 10 ṭanga 12 thleng hun hmangin Health Minister hian thu a sawi a, Commissioner Lalzamlova, India Eastern Territory Territorial Commander chuan Coffee Nite Pathian hnena hlanna hi neiin Major K Rohlupuia, Territorial Youth Secretary chuan Pathian thuchah a sawi bawk.
Tute nge kuminah inlan?
Coffee Nite 2020-ah hian kumdang ang bawkin zaithiam hrang hrang- R Lalruatfeli, Rpa ft Hlimhlimi, Stacy Punte, TBC Zaithanpuia, Sangtei Khuptong, Boyz of God, Zothanpuii, Dj Lalvenhimi, Hranghlui Trio, Grace Lalchhanhimi, Isaac Hnamte ft Lalduhsaki leh C Vanlalmalsawma te an an zai a ni.
Kumin Coffee Nite-ah hian Miss Mizoram 2020 Zirsangpuii hmel hmuh tur a awm a, Achhani (Achhani Innovative Dress) te pawh an inlan a, Coffee Nite theme song 'Immanuel' sak a ni bawk.
A kum 21-na a ni ta
Aizawl Temple Corps SAY hian kum 1999 aṭang khan kumtinin Krismas Urlawk zanah hian Coffee Nite hi an buatsaih ziah ṭhin. Thalai tam tak Urlawk zana biak-in hlat taka hun hmang turte'n biak-in nghenga hun an hman theihna tur leh chung mite show hmuhnawm tak lo hlui chu an tum a nih avangin kumdangah chuan Aizawl Temple Corps biak-in kawtah hun hman a ni ṭhin. Chumi bakah chuan charity event a ni ṭhin bawk a, Coffee Nite aṭanga an sum hmuh chhuah chu midang hnena luanchhuahna hun atan an hmang ṭhin.
Kuminah erawh hri a leng miau a, chumi a nih avang chuan kumin bik hi chu charity event angin an buatsaih thei lo a, Pathian zaia fak hona programme atan tawpa hun hman niin in lam aṭanga chhungkuaa TV leh internet kaltlanga Pathian fak hona hun atan an buatsaih ta zawk tih Coffee Nite 2020 Programme Chairman chuan Vanglaini a hrilh a ni.
Coffee Nite 2020 hi Zonet, LPS leh YouTube-ah live-in pek chhuah a ni.