Titanic-a dam chhuak lehkhathawn pound 300,000 in hralh

Kum 1912, April 15-a North Atlantic tuipuia vur tlang lian tak sut vanga chesual lawng lian, pil thei lo tur khawpa chhal Titanic-a chuang pakhat lehkhathawn, 10 April 1912-a a ziah chu UK ah lilam niin, pound 300,000 (USD 400,000) chuanga hralh a ni.

He lehkhathawn lilam hi Colonel Archbald Gracie ziah niin, mi tu tih hriat lohin Henry Aldridge and Son auction house, Wiltshire aṭangin nimin Pathianni khan a leia ni.

Lehkhathawn hralh hi an leina hmasa pound 60,000 let nga a to in hralh a ni leh ta a ni. Lehkhathawn hi Titanic pil hma ni ngaa ziah a ni. Col Gracie hi first class passenger niin lehkhathawn hi a cabin awmna C51 aṭanga a ziah a ni. Chhiatna rapthlak tak thleng vanga lawnga chuang mi 1,500 chuang daih an thihna aṭanga dam chhuak zinga mi, Gracie hian "The Truth About The TItanic" tih lehkhabu, an thil tawn chungchang ziahna chu a lo ti chhuak tawh bawk.