Kum 2020-ah pawh 'All I Want For Christmas is You' bawk a lar

Kumtin hian December thla a lo thlen apiang hian khawthlang ram lamah khu chuan nasa takin Mariah Carey hla All I Want For Christmas is You hi a lar thar leh ziah a, tunah pawh hian Billboard Hot 100 chart-ah No.2 a ni leh mek tawh! US mipuite chuan Krismas dawnah hi chuan he hla hi mall leh kawi tinah an play sup sup thin a ni ber a, tunah hian Krismas hlaah chuan an ngaithla leh nasa ber tawh a ni.

All I Want For Christmas is You hi kum 1994 a Mariah Carey album tihchhuah Merry Christmas-a mi kha niin, October 28,1994 khan a album-a single hmasa ber ni turin a tlangzarh a, a hit nghal rem rem hle.

The New Yorker phei chuan "one of the few worthy modern additions to the holiday canon" tiin a hrilhfiah hial a, chutiang khawpa hla lar nisi chu Billboard Hot 100 chart topper a ni hleihthei tlat lo. Germany, Canada, Australia leh France-ahte chuan tlangzarh a nih hnu lawkah chart topper a ni thuai a, US Billboard chart-ah erawh tlangzarh a nih atanga kum 25 lai a ral hnu, nikum khan Billboard Hot 100 chart topper a ni chauh thung.  Hemi a nih avang hian no.1 ni tura zinkawng thui ber hla a ni hial!

 Mariah Carey hian he hla hi a hralh hnem tawh hle a, copy maktaduai 16 lai a hralh tawh a ni. Hmeichhe artist-in Krismas hla an hralh hnem ber a ni hial a, kum 2017 thleng khan he hla atang hian dollar mtd. 60 lai a lalut tawh a ni.

 All I Want For Christmas vang hian Mariah Carey hi 'Queen of Christmas' tiin an sawi phah hial a, kum 2011 khan Justin Bieber nen he hla hi an record tha leh a, Under the Mistletoe album-ah kha chu chu an dah nghe nghe.