Billboard 200: No 1-ah SZA a rawn kir

American singer leh songwriter, SZA chuan Billboard 200 album chart-ah kum 2022 daih tawha a album tih chhuah 'SOS' chu No.1 ah a rawn kir pui leh. SZA hian Billboard 200 chart-ah a zawn loin kar 13 chhung No.1 a rawn nih pui thei ta a ni.

SZA hian December 9, 2022-a album a tih chhuahah khan track 23 awmin 2022 leh 2023 kum tir lam thleng khan kar 10 chhung No. 1 a nih pui thei a, kumin kumtir khan kar hnih chhung No 1 a ni leh bawk.

Billboard 200 album chart thar tih chhuah hi kum thum chhunga No.1 in equivalent unit a neih hniam ber ṭum niin thla hnih hnua chart-a debut an lan loh vawi khatna a ni bawk.

Chart tharah hian SZA album 'SOS' chuan equivalent album unit 52,000 neiin, chart hmasa lama pathumna aṭangin pakhatnaah a rawn kai chho ta a ni. He album-a hlate hian on-demand official stream mtd 68.29 an nei a, traditional album slaes hi 2,500 a ni bawk. Hmeichhia R&B/hip-hop album siam zingah Whitney Houston hnuah Billboard 200-a No 1 ni rei thei ber a ni. Pahnihnaah hian hun rei tak chhung No.1 lo ni tawh Kendrick Lamar album 'GNX' chu equivalent album unit 51,000 neiin a awm.

Billboard chart thara No.3-9 te hi No.1 lo hauh vek tawhtu niin, Morgan Wallen album 'One Thing at a Time' chu parukna aṭangin equivalent album unit 48,000 neiin pathumnaah a rawn kaisang. Sabrina Carpenter 'Short n’ Sweet' chuan equivalent album unit 47,000 neiin a dinhmun ngai, palina a la humhim a, panganaah PARTYNEXTDOOR leh Drake thawh dunna '$ome $exy $ongs 4 U' chu equivalent album unit 46,000 neiin a dinhmun a sawh nghet chhunzawm bawk.