The Girl on the Train entu an tam

North America-ah kar tawp chhung khan movie thar ṭha tak tak chhuah a awm nual a, chung zingah chuan Emily Blunt channa, The Girl on the Train chuan sum a lalut hnem ber a, entu ngah ber a ni.

Movie chhuak thar tur thlirlawk zingah pawh a film thawnthu avanga en ch‚kawm zinga lang, The Girl on the Train hian kar tawp chhung khan USD mtd 24.7 a lalut. He film hi psychological thriller a ni a, kum 2015-a novel tihchhuah behchhana siam a ni.

Rachel Watson (Emily Blunt) chu a pasal nen an inṭhen hnuah a tal bawraw hle. A apartment luahpui Cathy nena train-a an vahvelnaah, a pasal hluite in bula nupa la naupang takte pahnih chuan a rilru an la hle a, Watson chuan chu mite nupa chu nupa awhawma a ngaih an ni. Mahse a takah chuan an lo ni bik hauh lo mai a, nupa la naupang taka a nupui zawk chu a rinawm lo hle a, psychiatrist pakhat nen an inngaizawng a, chu chu Watson hian a hre nghe nghe. Chutia nupa ṭha tak anga ngaih, a nupui zawk rinawm lo chu a hmuhin a nupui chu engtin emaw tak tih a tum a, chutihlai chuan nupui chu a bo a, a thi ta mai. Chumi kal zelah chuan amah Watson an rinhlelh dan te, tualthihna chungchang chhui chhuah dan te he film-ah hian tarlan a ni.

Kar hmasa leh lama pakhatna, Eva Green channa, Miss Peregrine's Home for Peduliar Children chuan USD mtd 15 lalutin pahnihna a la luah thei a, Mark Wahlberg channa Deepwater Horizon chuan USD mtd 11.8 lalutin pathumnaah kan hmu. Beisei phak lo The Magnificent Seven-in beisei a phak lo zel a, palinaah tla thla tawhin USD myd 9.2 a lalut.

Box office movie-te

"The Girl on the Train (2016)" - $mtd 24.7

"Miss Peregrine's Home for Peculiar Children" - $mtd 15

"Deepwater Horizon" - $mtd 11.8

"The Magnificent Seven" - $mtd 9.2

"Storks" - $mtd 8.5

"The Birth of a Nation" - $mtd 7.1

"Middle School: The Worst Years of My Life" - $mtd 6.9

"Sully" - $mtd 5.3

"Masterminds" - $mtd 4.1

"Queen of Katwe" - $mtd 1.6