Mimi Renthlei Kum 9 hnuah album thar

Kum 2007 khan a hunlai album hlawhtling pawl a ti≠chhuak a, kha mi hnu khan album a tichhuak lo leh ta vang vang a, kum kua zet a vei hnuah Mimi Renthlei chuan a album thar a tichhuak leh ta.

Hman ni lawk khan a music video thar 'Hrilh a'n ka mawi si lo' a rawn tichhuak a, a tihchhuah hnu lawkah album-in Mimi Renthlei chuan a rawn vaw zui ta bawk. Mimi Renthlei album thar hi 'Run rem ang aw' tih a ni a, nizan khan Floria Glamour Banquet Hall-ah K. Sapdanga'n a tlangzarh. He album-ah hian hla 13 a awm a, music video siam loin audio veka dah a ni.

Album a siam hmasak leh a siam hnuhnun inkar a hla hle mai a, Mimi chuan, "Mizo music industry thlir chuan album siam hi a huphurhawm khawp mai," a ti. Kan music industry, a bikin hralh chhuah lamah harsatna kan la tawk nasa hle a, chu bakah piracy nasa a sawi a ni. "Siam ka huphurh a, tun ṭumah pawh hian risk tak meuh meuhin ka siam a ni," a ti. Hman deuhah kha chuan album siam reng rengin hmuh let beisei tur a awm lo ṭhin a, tunah erawh chuan hmuh let tur tlem tlem a awm ve ta a, a ziaawm ta viau.

Mimi Renthlei hian a album hi a duh hle a, ṭha a ti a, mipui pawhin an duh hle ngei ang. A satu leh siamtuin a duh ang taka a siam leh record a ni a, chuvang chuan lengzem album ṭha tak kan neih phah leh dawn a ni. Ka album chhunga ka hlate hi ka duh taka ka thlan te an ni a, a nalh chu ka ti khawp mai," a ti. "Ngaithlatute lung tilengtu lo ni se ka ti hle," a ti.

He album-a music hi PB Lianhmina, BZA, Ephraim leh Lawma te khawih leh siam a ni a, a belhchian tlak viau dawn. Amah Mimi pawhin, "An thiam khawp mai," a tihte an ni. Mizo Idol judge hian music-ah tawn≠hriat a nei tawh a, chuvang chuan music ṭha leh ṭha lo pawh a hria a, a sawi hi a dik ngei ang. 'Run rem ang aw' music album hi Colney Brothers lejh Purple-ah te zawrh chhuah a ni ang.