Michael Jackson Sum a la lalut hnem ber fo

A thihna pawh kum ruk zet a ral tawh a, chuti chung chuan King of Pop tia sawi hian sum a la lalut hnem hle. Michael Jackson hi milar thi tawhte zinga sum lalut hnem ber a ni.

Macabre chuan mitthi tawh zinga sum lalut hnem a tarlanah Michael Jackson hi sum lalut hnem ber a ni. Tun thla 12 kalta chhung chauh khan Michael Jackson hian a hmingin USD mtd 825 zet a la hailut thei fo. Hetiang zat sum a hailuh fo theihna chhan pakhat chu Sony/ ATV Music Publishing-i'n a music te, chubakah a hming chuanna thil eng eng emaw te a la hralh chhuah reng vang a ni.

Michael Jackson hi kum 2009 khan a thi a, a thih hnu aṭang hian mitthi tawh zinga sum lalut hnem tarlanah pakhatna a la luah deuh char char reng, kum 2012 khan pakhatna a ni lo a, hemi ṭum hian Elizabeth Taylor chu sum lalut hnem ber a ni. Elizabeth Taylor hi kuminah chuan 13-na chauh a ni tawh thung.

Thih hnua sum lalut hnem ber pahnihna chu cartoonist hlawhtling, Charles M. Schulz a ni. Ani hian thla 12 chhung khan, ama hminga sum a la lakluh zawng zawng hi USD mtd 48 a ni a, Michael Jackson nen chuan an sum hmuh hi a inthlau hle. Charles M. Schulz hian cartoon character hrang hrang a siam a, a hlawhtling hle a, Peanuts hi a cartoon comic zinga lar ber pawl a ni.

Golf lama mi hmingthang Arnold Palmer chu mitthi tawh sum lalut hnem pathumna a ni a, USD mtd 40 zet thla 12 chhung khan a lalut. Elvis Presley chu sum lalut hnem palina a ni a, USD mtd 27 a lalut a, kumina thi, Prince chu panganaah a lang pha a, a hming hian USD mtd 25 zet a la lalut thei. Thih hnua sum lalut hnem dangte chu Bob Marley (USD 21), Theodor 'Dr. Seuss' Geisel (USD mtd20), John Lennon (USD mtd 12), Albert Einstein (USD mtd 11.5), Bettie Page (USD mtd 11), David Bowie (USD mtd 10.5), Steve McQueen (USD mtd 9) leh Elizabeth Taylor (USD mtd 8) te an ni.