musicradar. John Mayer hla paruk guitarist-te'n an ngaihthlak ngei tur chu
Musician website lar tak musicradar. chuan kum 15 chhung vel chu khawvela guitarist lar ber pawl ni ta John Mayer hla paruk guitarist-te'n an ngaihthlak ngei tura ṭha an tih chu Pathianni liam ta khan an chhawp chhuak.
John Mayer hi a tirah chuan pop singer angin khawvelin hre mah se tunah erawh khawvela guitarist ṭha ber zingah chhiar tel a ni tawh. Album a tih chhuah apiangin a music genre a tidanglam ṭhin a, romantic, soft-rock/pop music hmangin khawvelin hmelhriat mah se tunah chuan blues guitarist ṭha ber zingah chhiar tel a ni tawh.
Eric Clapton meuh pawhin guitar thiamna kawngah 'master' tia a lo sawi tawh, John Mayer hi mi tam tak chuan muangchangin 'guitar legend' a ni chhoah an ngai a, mi tam tak chuan 'legend' a ni tawh niin an sawi fo bawk.
musicradar. in guitarist-te'n a hla an ngaihthlak ngei tura ṭha a tih parukte chu:-
1. Neon (Room For Squares, 2001)
Kum 2001-a a album tih chhuah ‘Room For Squares’-a mi Neon guitar riff hi a ngaithla tawhte chuan a awlai lohzia an hria ang.
'Drop C' tuning-ah guitar dahin a perh theih a, a kutzungpui hmangin bass line hnehsawh takin a perh tel a, chuti chunga a rhythm leh a harmonic a la vawn ṭhat dan chu musicradar. hian a fak hle.
2. Belief (Continuum, 2006)
Mizo tam berin John Mayer kan hmelhriat ṭanna album, kum 2006-a a tih chhuah Continuum-a mi Belief 'main riff' mawizia hi a ngaithla tawhte chuan an hre ngei ang.
A riff danglam tak mai piah lamah hian a kara 'slide' rimawi tak chuan a chei mawi zual hle. Chutah guitar solo mawi tak mai, blues tak maia rawn kal zawng zawngte nen, khawthlang lam rimawi expert-te pawhin mawi an ti hle a ni ngei ang, musicradar. pawh hian ngaihthlak tura ṭha a tih pahnihna a ni hial.
3. Vultures (Continuum, 2006)
Continuum-a mi tho Vultures-a 'Funky grooves' mawi tak ngaihthlak tur awm hi musicradar. chuan kum zaibi 21-ah hetiang rimawi ngaihthlak tur hi a vang hle a ni, a ti hial.
Guitar solo special tak chu fak zui bawkin, he hlaa music hi Mayer 'electric guitar hero'-a siam chhotu track zinga mi a ni, a ti.
4. In Your Atmosphere (Where The Light Is, 2008)
Kum 2008 khan John mayer hian live album ṭha tak mai 'Where The Light Is' a tlangzarh a, hetah hian a studio album-a a dah tel lem loh In Your Atmosphere chu acoustic guitar nen a sa a, a guitar perhah hian hammer-on, slide, bend leh harmonic-te chu a kim nghal vek niin musicradar. chuan a tarlang.
A guitar a 'tune' dan hrim hrim hi a dangdai hle nia sawiin, belhchian dawl an ti hle.
5. Ain’t No Sunshine (live, 2010)
John Mayer hi live-ah a ṭha hle a, guitar improvise a uar bawk a, hei vang hian guitarist tam tak chuan a studio album-a guitar solo aiin live-a a solo-te hi ngaihthlak an chak zawk ṭhin.
Kum 2010 Crossroads Festival-a tun hnai lawka thi ta Bill Withers hla 'Ain’t No Sunshine' a version-a a cover khan musicradar. hian a dah sang hle a, ngaihthlak tur ṭha a tih pangana a ni.
6. I Guess I Just Feel Like (single, 2019)
A hnu khartua an dah chu nikuma single a tih chhuah 'I Guess I Just Feel Like' kha a ni.
He hlaa a music hi a nalh hle a, a bikin a 'outro' guitar solo hi mi mawi tih zual a hlawh. A hla kara guitar-a a rawn 'fill' zeuh zeuh a nalh piah lamah a hla tawpa Duhlian ṭawng taka ṭingṭang a zut hi a mawi hle a, hemi guitar solo a practice lai video minute sarih laia thui YouTube-a a dah pawh guitarist-te chuan an lawm hle.