Nobel Prize in Literature Bob Dylan
Music khawvel sawi tawha a hming dai tawh lo tur, khawvela hla ropui, mite hneh ṭhintu phuahtu, Juda pachal Bob Dylan chuan Nobel Prize in Literature a dawng a, amah hrechiangtu apiangin a dawng ‚wm a nihzia hi sawi tur an hre hnem ang. Musician zinga Nobel Prize in Literature dawng hmasa ber a ni.
Hla lar leh nalh, chuai thei lo anga kan ngaih tam tak phuahtu chu Bob Dylan a ni. He Juda pachal talent han neih ṭhat dan em emzia hi tiin mi tam tak chuan hahipa an sawi a ni. A Hebrai hming chu Shabtai Zisi ben Avraham a ni a, Duluth, Minnesota-a piang a ni. Music lamah turu hle mah se, lehkha zir lamah erawh chhuan tur a nei lo. Kum 1960 khan high school a kal laiin a zirna a bansan tawp. Hemi hnu hian New York-ah kalin a hun pumin music lam a khawih ṭan ta a ni. School a bansan chhan ber hi graduation party-ah an band an zai laiin an school principal chuan an zai tihtawpsak a, hemi avang hian a bansan.
Kum 1962 khan a hming chu Robert Dylan tiin a thlak a, kum 1962 aṭang hian manager a nei ṭan a, hemi kum vek hian mi album-a harmonica a tum chu John Hammond-a'n a lo hria a, record deal a siampui ta a ni. Record deal a siam aṭang hian a album hmasa ber, Bob Dylan tih chu kum 1962 khan a tichhuak.
Ngaihsan tam tak a nei chung zingah chuan Charlie Chaplin kha a langsar hle a, chu baka langsar leh chu Elvis Presley kha a ni. Kum 1977-a Elvis Presley a thih khan a uizia a lantir nan chawlhkar khat chhung ngawt chu a ṭawng miah lo.
Hla hit leh ropui tak tak phuah mah se, ama sak ngawr ngawr hi chu a hlawhtlinpui dan a hlawhtling tawk lo a tih theih ang; midangin an sak hian a nalh a, a mawi viau zawk zel! Billboard chart-ah pawh top 10-ah a la inhlangkai lo. A thlen san ber chu kum 1965-a mi, Like A Rolling Stone kha a ni a, 12-na a thleng hram a, chumi dawta mi chu kum 1966-a mi, Rainy Day Women kha a ni. A hla phuah zingah 'Blowin in the wind', 'Knockin' on heaven's door', 'Forever Young', 'I shall be released', 'Most of the time', 'My back pages' tihte chu kan hriat lar ṭhenkhat a ni a, hla tam tak a phuah tawh a, a lar chin, zaithiam dangtena an hlawhtlinpui chin ringawt pawh chhiar tham fe a awm.