Ben Affleck a hlawhtling leh

Ropui taka Argo a hlawhtlinpui hnuah Ben Affleck hi movie-ah a hlawhtlinna kawng a tluang hle rih zel. Tuna a movie thar The Accountant pawh box office-ah pakhatna a luah leh.

The Accountant hi action thriller film a ni a, kar tawp chhung khan USD mtd 24.7 a lalut. Kar liam ta chhung khan he movie han el phak an awm lem lo a, pahnih, Kevin Hart-a channa nena an sum lakluh pawh a inthlau hle. Review hrang hrangah pawh The Accountant hian fak a hlawh hle a, CinemaScore chuan A grade a pe nghe nghe.

Kevin Hart-a channa, 'Kevin Hart: What Now? chu pahnihnaah a awm a, kar tawp chhung khan USD mtd 12 chauh a lalut. Critics te chuan Kevin Hart-a movie hi sum lalut tam lo mah se an fak hle. Kevin Heart hi tunlai khawvela comedian hlawhtling ber zinga an ngaih thu an sawi a, theatre khat tlat a film entu a nei thei reng a ni an ti.

Kar hmasaa pakhatna, 'The Girl on the Train' chu pathumnaah a la awm thei a, kar tawp chhung khan USD mtd 12 a thawh chhuah belh leh. Eva Green channa, fantasy movie, Miss Peregrine's Home for Peculiar Children chu palinaah a la awm thei bawk a, USD mtd 9 lai a la thawk chhuak thei.

Box office movie

"The Accountant" - $mtd 24.7

"Kevin Hart: What Now?" - $mtd 12

"The Girl on the Train (2016)" - $mtd 12

"Miss Peregrine's Home for Peculiar Children" - $mtd 9

"Deepwater Horizon" - $mtd 6.4

"Storks" - $mtd 5.6

"The Magnificent Seven" - $mtd 5.2

"Middle School: The Worst Years of My Life" - $mtd 4.3

"Sully" - $mtd 3

"The Birth of a Nation" - $mtd 2.7