November 15-ah Eric Martin November 1 aṭangin ticket zuar chhuak dawn

Mr. Big frontman, Eric Martin-a'n Aizawla concert a neih tura inruahmanna chu kalpui zel a ni a, ticket chungchang pawh tihfel a ni thawkhat ta. Ticket hi November 1 aṭang hian zawrh chhuah a ni ang. Aizawla concert a rawn neih hun tur hi November 15 a ni a, a hmun hi Tribal Art Centre, Tanhril a ni.

American band lar, Mizotena an hla kan sakpui duar duar theih khawpa lar leh hlawhtling, Mr. Big-a an frontman Eric Martin hian India hmarchhakah tour a rawn nei dawn a, October 27 hian Itanagar, Arunachal Pradesh-ah North East Tour hi a ṭan ang. Tour-ah hian Dimapur, Kohima, Shillong, Guwahati leh Imphal-ah te concert hi a nei bawk ang. India ram khawpui dang Mumbai leh Chennai-ah te concert a nei dawn bawk a, Gangtok leh Dubai te pawh tun ṭum a tour schedule-ah hian an tel bawk.

India rama Eric Martin-a'n concert a neih hnuhnun ber chu kum 2007-a Shillong Polo Ground-ah khan a ni a, mi 20000 chuangin an chhim a, kumin pawh hian Shillong Polo Ground-ah tho November ni 19 hian a concert ang. Aizawl bikah chuan Zo Events & Management ten he concert hi an buaipui dawn a, tih fel tur pawimawh ti zo thawkhatin November ni 1 aṭangin ticket lei theiha siam tum a ni.

Aizawla a concert hunah hian Mizo zaithiam leh band ṭha ber berten mipui an awi dawn bawk. Ruahman dan chuan Novermber 14 zan hian Party with Eric Martin siam tum a ni a, Dinner leh live music party buatsaih tum a ni a, hemi atan hian mi tlem te tan ticket siam tum a ni bawk. Eric Martin concert hi kimchangin a official website www.ericmartin.com-ah tarlan a ni.