September thla, a lum ber kum

NASA hnuaia Goddad Institute for Space Studies-a scientist-te chuan tun September thla kha kum 138 chhunga September thla zingah a lum ber tih an sawi. September thla chhung bik chauh khawlum dan an chhinchhiahah kum 2014 kha a lum ber ṭum a ni ṭhin a, mahse kum 2016 September thla hi kum 2014 September thla aiin 0.004 degree Celsius-in a lum zawk.

Kumin September thla lum lam chawhrual kha kum 1951-a Sep≠tem≠ber thla chhung lum lam chawhrual aiin 0.91 degree Celsius-in a lum zawk.

Kumin kan hman chhoh meka thla hrang hrang lum lam kha kum dang nena khaikhinin a lum zawk char char a ni deuh ber mai. June thla bik kha kum dang June thla aiin a lum a, chutiangin August thla pawh a ni bawk.

June thla kha kum 1998 hnu lama June thla zingah a lum lamah pathumna a ni. August thla leh July thla kha a lum ber thla a ni bawk. August thla lum ber kum chu 2014 kha a ni ṭhin a, mahse tun August thla khan a rawn khum a, kum 2014 aiin 0.16 degree Celsius-in a lum zawk a, chu chu kum 1951 aṭanga kum 1980 inkara August thla lum lam chawhrual aiin a lum fe zawk a ni. July thla bikah chuan kum 2011 leh kum 2015-a July thlate kha kumin July thla hian a rawn kh˚m a, heng kumte ai hian 0.18 degree centigrade-in a lum zawk.

Scientist-te chuan kumin thla tin mai kha an thla anpui kumdanga mi aiin a lum zawk deuh vek a, kum 1950 aṭanga kum 1980 chhunga khaw lum lam chawhrual aiin kumin hi 0.84 degree centigrade-in a lum tawh zawk. July thla khan Kuwait chuan an ram khaw lum lam teh tawha a la lum ber ṭum an tawng a, July 21 kha Kuwait tana a lum ber ni a ni a, hemi ni hian khaw lum lam hi 54 degree Celsius zet a ni.