SIAR music video hmasa ber

Nikum maia indin kha ni mah se, an thiam viau. Vairengte chhulchhuak vek, group thar, SIAR chuan an music video hmasa ber chu an tichhuak a, zanin hian Zonet-ah en theih a ni ang.

SIAR music video hmasa ber hi 'Zoram tan ṭhalaite' tih a ni a, an group member zinga mi, Eng­mawia phuah a ni. He hla hian zirtir ṭha tak a nei a, Mizo­ram hmasawna'n ṭhalai te'n thawh hreh nei loin, hna zahawm leh hnuaihnung pawh thliar hrang lem lo a, eng hna pawh hnam dangte tih atana khek loin, Mizo ṭha­laite'n kan tih ve vek theih­zia infuihna lam hla a ni.

He hla phuahtu Escape Engmawia chuan a hla phuah chhan sawiin, "Mizo ṭhalai zelthel tak tak an awm nual a; hna a vâng tiin thawh hreh neiin ṭhenkhat chu an tlawngawl hle. Hei hi ka vei a, Mizo ṭhalaite tan hna thawh tur a la tam a, eng hna pawh thawh hreh nei loa kan awm chuan hlawhtlinna lamtluang a zawh theih vek a ni," a ti.

SIAR music video hmasa bera voice hi Gosen Records-a an thun a ni a, Larry Pachuau chuan chulmam hna a thawk. Music hi Nunzemawia siam a ni a, electronic music lam a ni daih a ni. SIAR group-ah hian Engmawia, Chhuan­mawia, Henry leh Michael te chu member an ni.