'Aarogya Setu' downloadtu an pung chak

India-a Covid-19 contact-tracing app siam thar 'Aarogya Setu' chu khawvela mobile app downloadtu pung chak ber a ni ta a, Thawhlehni zan thleng khan mi maktaduai 50-in an download tawh a ni.

Ni 13 chhung lekin download mtd 50 chuang a awm hman tihna a ni a, prime minister Narendra Modi-in download tura mipuite hnena ngenna a siam niah khan mi mtd 11 laiin an download nghal bawk. Aarogya Setu app download zinga 99% hi Android-ah a ni a, ‘Pokémon GO' record kha a khum a ni. ‘Pokémon GO' kha tlangzarh a nih khan Google Play kaltlangin ni 19 chhungin mi maktaduai 50-in an download thung. Thawhlehni zing dar 10-a Prime Minister-in thuchah a sawi hma kha chuan mi mtd 39-in an download tawh a, thuchah a sawi hnu khan minute khatah mi 1,00,000-in an download thei a ni.

Programme director of frontier technologies, Niti Aayog, Arnab Kumar chuan,"Nilainiah mi mtd 50-in an download hman chu kan beisei a, mahse a hma niin hei hi a tling hma ta zawk a ni. Thawhlehniah ringawt khan mi mtd 11-in an download a, chu chu app tlangzarh tirh aṭanga ni khata download an tam ber ṭum a ni. PM Modi-a'n thu a sawi zawh hnu lawkah khan minute khatah download 1,00,000-te a tling hman a, chawhrualin khami ni khan minute khatah download 20,000 vel a awm ang a ni." a ti.