Thingpui dawra thawk tlangval kha a model dawn

Tunhnaia social media-a lar tak pakhat chu Pakistan tlangval, thingpui dawra thingpui siama inhlawhfa ve mai mai kha a ni. A thlalak internet-ah a darh a, amah a hmel a lo ṭha bawk sia a, tunah chuan modelling contract neihpui turin online industry lamte an che chhuak ta der mai.

Thlalatu pakhat, hmeichhia, Javeria tia koh, Jiah Ali chuan hman deuh khan Islambad kawtthlerah thla lain a chhuak a, chutah chuan tlangval pakhat, thingpui dawra thawk pakhat thla a laksak. A thlalak hi October 14 khan instagram-ah a phochhuak a, thehdarh kual a ni zui ta a, miin hmelṭha an tiin a lar chak hle. He tlangval hi Arshad Khan a ni tih hriat chhuah a ni a, Khyber Pakhtunkhwa-a Mardan city-a mi a ni. Internet-a a thlalak a lar hnu hian an dawrah nula an rawn kal hnem phah hle tih a sawi a, amah thla lakpui tur ringawtin nula 40 aṭanga 50 vel an kal tawh.

Hetia a thlalak a lar hnu hian Islambad-a online retailer pakhat chuan an shopping store-a model atan an sawm a, model-ah an hmang zui. Facebook lamah pawh suit nena a induan zar a, a thlalakte pawh tar chhuah a ni tawh. He pa hi a mitmu a pawl a, Pakistan-ah chauh ni loin, India leh Middle East thlengin a lar hle.