Timberlake-a'n A album thar tur chungchang a sawi

Khawvela album hlawhtling pawl chu The 20/20 Experience kha a ni a, he album siamtu Justin Timberlake chuan album thar tihchhuah leh tur chungchang a sawi. A album tihchhuah leh tur hi a studio album pangana tur a ni.

Timberlake chuan a album thar turah hian Pharrell Williams nena an zai dunna te, Max Martin leh Timbaland te nena an zai dunna te a awm dawn tih a sawi. A album thar tur chungchanga bengverhtu chu he album hi RnB a ni dawn lo a, hman ni deuha mitena an rin, country music album pawh a ni dawn lo.

BBC-in an kawmnaah, hman ni deuh khan Little Big Town Studio-a hmuh a nih thute, chuti a nih chuan country music album a siam dawn em niang tihte an zawt a, Timberlake chuan, "Country album ka siam ang tih ka sawi lo ang a, R&B album ka siam pawh ka ti lo ang," tiin a chhang. Country album chungchangah a hmain America-a seilian a nih bakah Nashville-a awm a nih bawk avangin country music hi a pawimawh hle a ni a ti.