Joaquin Phoenix leh John Legend-in tang chhuah turin ngen

'Joker' actor leh Oscar winner Joaquin Phoenix chuan New York Governor Andrew Coumo hnenah ngenna siamin hripui leng vangin tan-ina tang ṭhenkhat chu chhuah turin a ngen.

Thawhlehni khan twitter kaltlangin ngenna a siam a, New York-a tan-ina tangte lakah chuan zahngaihna lantir tura ngenin mi tam tak nunna chu a hmalaknaah a innghat tih a sawi. "Tumahin Covid-19 vanga tan-ina thih hi an phu lo," a ti.

Singer John Legend pawhin Thawhlehni vek khan ngenna hi siamin, New York Governor Andrew Coumo chu hma la turin a ngen a, New York-a community tam tak himna leh hriselna chu tan-ina tang tihtlemin a thlen thei tih a sawi.

An tan hun zo ṭep tawhte lakah chuan zahngaihna a lantir thei tih sawiin, hriselna ṭha lote leh kum upate pawh chhuah turin a phut bawk.

Andrew Coumo thuneihna hnuaiah hian hripui darh nasa zual tur venna atan 'parole violator' 1,100 chu chhuah an lo ni tawh a, mahse mi tam tak chuan tang tam zawk chu la chhuah turin an beisei a ni.