'Future Nostalgia' hian ka fan-te nen min inhnaihtir: Dua Lipa
Lockdown laia khawthlang milar chancein ngah ber pawl chu British Singer Dua Lipa hi a ni hial awm e. Lockdown ṭantirh lamah khan a ruahman aia hmain a studio album pahnihna 'Future Nostalgia' a tlangzarh a, he album hi a hlawhtlin tak em avangin he zaithiam chhe lo tak hian lockdown lai ni mah se chanchin thar a ngah phah ta hle a ni.
Fashion magazine Elle-in a kawmnaah Dua Lipa chuan a album thar a tichhuak ta chu a lawm hle tih a sawi a 'Future Nostalgia' chuan a fan-te nen a inhnaihtir tih a sawi a ni. "Ka music ngaithlatute nen hian tun hma zawng ai khan kan inhnaih tawh a. Thinlunga thil vei leh natna sawi chhuahte hi a pawimawh hlein ka hria," tia sawiin, hla a phuah dawn pawhin nat a inhuam thute a sawi bawk.
Kum 24 mi lek, album pahnih chiah la tlangzarh chung sia khawvela zaithiam lar ber pawl ni thei, model ni bawk Dua Lipa chuan Elle hnenah hian lockdown chhungin show hrang hrang a en tam tawh hle tih sawiin 'Ozark', 'Tiger King', 'The Night Of', 'The Outsider' leh 'Servant'-te bakah movie dang tam tak a en ve tih a sawi. Dua Lipa hian 'Future Nostalgia' hi March 27 khan a tlangzarh a, lockdown karah tlangzarh mah se a hlawhtling hle. An ram UK Album Chart-ah No.1 a nihpui tawh a, Australia, Belgium, Ireland leh United States-ahte pawh top 5-ah a inhlankaipui vek tawh bawk.
'Future Nostalgia' a buaipui rei
British Singer hian kum 2017 khan a studio album pakhatna ama hming chawi 'Dua Lipa' chu a tlangzarh a, 'Future Nostalgia' hi a studio album
pahnihna a ni.
Kum 2018 January thla aṭang khan a buaipui ṭan tawh a, recording pawh hemi aṭang hian a ṭan tawh. Mahse thla hmasa khan a tlangzarh chauh thung.
He album atan hian hla 60 vel lai a record hman a, chung zinga 11 chauh chu album-ah hian a dah thung a ni. Nile Rodgers, Max Martin, Mark Ronson leh Pharrell illiams-te chu 'Future Nostalgia'-ah hian thawhpui mah se album final track list-ah heng mite a thawhpuina hi a dah tel lo a ni.
Disco-pop, electropop leh dance-pop lam lam hawi hla vek a dah a, Lipa hian a album thar hi "dancercise class" tia hrilhfiahin 1980s, 1990s leh 2000s music-te a hawhpawlin "timeless modern-retro dance sound" a siam niin a sawi.