KC TVS-in Hnahthialah huang zauh

TVS Mizoram dealer, KC TVS chuan huang zauhin Electric Veng, Hnahthialah branch an hawng. TVS Hnahthial Branch hawnna hi Aizawla showroom manager Lalhmangaihsanga leh network manager Michael Lalchhandama'n telpuiin, a lawm nan Hnahthial District Inter-Branch YMA Basketball Tournament an sponsor dawn a ni.

November 2022 khan Bawngkawn Aizawlah KC TVS showroom hawn a ni a, lirthei ke hnih nei 9,000 vel hralh tawhin district hrang pasarihah sub dealer an nei tawh. Hnahthial bik hi branch anga kalpuiin an hmunpui Aizawl aṭangin an enkawl zui rih dawn a ni.

KC TVS chief executive officer Kevin Vanlaltlana chuan anmahni duhsaktu Mizo mipui zarah hma an sawn zel avangin lawmthu a sawi a, Indian company a nih angin TVS-in hamṭhatna a nei a, an lirthei siamte thiamna leh ṭhatna lamah a sang a, chutih laiin a man a tlawm a, a tloin spare part pawh a tlawm bik a, mipui nawlpui banphak lehzual a ni, a ti. TVS hian Asia ram 80 chuangah an lirthei hralh chhuak tawhin, BMW Motorrad nen thawk dunin Europe-ah pawh an lut ṭan chho mek bawk.