James Bond chu mi ngo a ni ngei tur a ni - Henry Golding

James Bond film thar siam tura changtu tur chungchangah sawi a tam hle. 007 atana Daniel Craig thlaktu atana sawi zinga mi, Asian zinga James Bond ni thei hmasa ber tur nia sawi rik, Henry Golding chuan a tan thil lawmawm tak ni mah se James Bond nihna dik tak chawinun zel a, British mi, mi ngo ngei ni zel se a duh thu a sawi.

Crazy Rich Asians star, British-Malaysian actor Golding chuan Bond film siam zel turah a nihna thlak tura nawrna hi awm lo se a duh thu a sawi a, Ian Fleming-a'n Bond a din chhuahna ngei ang chu nih tir zel ṭha a tih thu a sawi. Character dang chan tur a tam tiin, fiamthuin 008 pawh a ni thei tiin a sawi zui bawk. Ian Fleming novel behchhana siam, British spy franchise James Bond hi Amazon in an lak hnuah, tunge 007 ni dawn ta tih sawi thawm a tam tawh hle a, British spy lemah hian American actor hman an tum nia sawite pawh a awm. Mahse tun thlengin tumah tih chian an la awm lo.