Harry Potter TV series-a changtu turte pho chhuak

HBO chuan JK Rowling lehkhabu, Harry Potter behchhana TV series a siam tura changtu tur pathumte chu thlan fel ni tawhin, a rawn pho chhuak ta.

Harry Potter TV series-ah hian Harry Potter lemah Domic McLaughin, Hermione Granger lemah Arabella Stanton leh Ron Weasley lemah Alastair Stout te an chang dawn. Nikum khan he series-a changtu turte zawn a nih tur thu hi puangin, audition-ah naupang 30,000 chuang a inlan a ni. Changtu tura thlan chhuah pathumte hi lemchan lama mi thar vek an ni. A puitling lam changtu tur chu eng emaw zat thlan fel an lo ni tawh bawk. A lehkhabu ziaktu, JK Rowling hi TV series siam turah hian executive producer a ni dawn a, HBO chuan a thawnthu kalphung zawm ṭhat hle an tum thu pawh an lo sawi tawh bawk.