Zaninah NBE Tata Motors Clash of the Stars 2025

Kings & Prophets Promotions chuan zanin dar 7:30 hian LPS Arena-ah NBE Tata Motors Clash of the Stars 2025 a buatsaih leh dawn. A hmunah ticket a lei theih dawn a, LailenTV YouTube channel-ah Rs 199 in Livestream a join theih bawk ang.

Professional and exhibition boxing event, Clash of the Stars hi kum 2022 khan a vawi khatna atan buatsaihin, rapper lar G'nie leh film star Papuia Pachuau ten professional boxing an khel a ni.

Kumin hian show changtlung leh hmuhnawm tak chhawpchhuah a ni dawn a, Mizoram boxing khawvela buk rit tak tak inhnek hmuh tur an awm dawn.

Main event-a inhnek tur hi Lalrinsanga 'Sangtea' Tlau leh Thai boxer Poon BBN an ni. Sangte hi Mizo zinga World Boxing Champion kan neihchhun a la ni. Co Main bout tan boxing ngainatuten kan en chak, John Kenty Vanlalhlimpuia'n Russian boxer, feet 6'2-a sang Mikhail Vetrila a hnek dawn bawk.

Celebrity exhibition-ah Drew Pachuau leh Rala Kone te an inlan dawn a, anni pahnih hian social media lamah pawh thawm an nei lian hle. Drew Pachuau hi filmmaker niin In-House Production neitu a ni a, Rala Kone hi actor leh E-Gamer lar, Mizoram aiawh pawha lo chhuak tawh a ni.

Zanina inhnek tur zingah hian Hlubawiha vs Johnny Nongrum (Meghalaya), Denis vs Franky Momin (Meghalaya) leh Enkawltira vs Eric Curtman an awm bawk.

Youth Icon Taitea leh Mizo Idol Hmangaihi ten zanian pungkhawmte zaiin an awi dawn a, Lil Kiki te pawh Rala entrace-ah an zai dawn bawk a ni.