Gal Gadot film chanlai ti buaitu mi 5 man

Israeli actress, Gal Gadot film thar tur, central London-a shooting a neihnaah Palestinian thlawptuten nawrh huaihawtin an ti buai ṭhin a, an zinga mi panga man an ni tawh tih Metropolitan Police-ten an sawi.

Palestinian Campaign for the Academic & Cultural Boycott of Israel (Pacbi) chuan Gadot hian Gaza Strip-a Israel sipaiten Hamas firfiak laka beihpui an thlakna a thlawpna thute a sawi avangin a film-te chu boycott an phut thu an lo sawi tawh a ni.

Kum 40 mi, 'Wonder Woman' leh 'Fast and Furious' star Gadot hian action thriller 'The Runner' shooting hi a nei mek a, an film channa hmunah hian Palestinian thlawptu lam hian lungawi lohna an lo lantir fo tawh a ni.

Kumin March-a Hollywood Walk of Fame-a Gadot star khuhhawnna inkhawm neih pawh Palestinian thlawptu lam hian an lo ti buai tawh bawk.