One World: Together at Home concert

Lady Gaga hmalakna hnuaia neih, World Health Organisation leh Global Citizen-te nen ṭangruala Inrinni zana neih tak 'One World: Together at Home' concert chu hlawhtling taka neih a ni a, milar 70 aia tam he hunah hian an inlan.

Hmalatu ber Lady Gaga chuan hla hlui tak 'Smile' hmangin concert hi a kick off a, "Zanin hi pawisa khawnna hun tur a ni lo a, chuvang chuan in wallet-te dah bo ru, artist-te hian lawmthu an rawn sawi dawn a ni," tia sawiin an hun hman chu “our love letter to the world” tiin a sawi nghe nghe. WHO leh Global Citizen-te nena an thawkho thei chu lawmawm a tih thu sawiin medical worker-te tan chuan nitin a ṭawngṭai ṭhin tihte pawh a sawi a ni.

'One World: Together at Home' concert hi Jimmy Fallon, Jimmy Kimmel leh Stephen Colbert-te chuan an host a, milar inlan an 

ṭhehnem hle. Khawvela zaithiam lar ber ber he hunah hian inlanin chung zingah chuan Taylor Swift, Elton John, Celine Dion, Jennifer Lopez, Madonna leh The Rolling Stones-te pawh an tel.

Milarte hian coronavirus dona kawnga hma tawnga ṭang healthcare worker-te leh ven­himna hna thawktute hnena lawmthu sawina atan he hun hi an hmang a ni ber a, India ram mi pahnih Priyanka Chopra Jonas leh Shah Rukh Khan-te pawh an inlan bawk. 

Country music superstar Keith Urban chuan "Higher Love" hmangin thlirtute a awi a, tunlai thiamna a hmang ṭangkai a, 'double role' mai duhtawk loin amah ang pathumin he hla hi perform a ni.

Guitar hrang ṭheuh an perh bakah, Keith Urban pathumte chuan a hrang ṭheuhin an zir nia a sawi chuan fan-te a tihlim hle. Social media lamah pawh hei hian sawi zui a hlawh.

Shawn Mendes leh Camila Cabello-te chuan "What a Wonderful World" tih thiam takin an sa dun a, Shawn Mendes piano tum Camila-i'n a lo zaipui vel chu an hmuhnawm hle. Shawn  lubuk tak chu social media lama comment-tute'n sawi nuam an ti a, a zaithiamna erawh quarantine hian a nghawng ve lem lo.

Green Day frontman Billie Joe Armstrong chuan an band hla hit 'Wake Me Up When September Ends' a sa ve bawk. He hla hi mi tam tak tan chuan kan boruak tawn mek nente pawh a 'relate' theih viauin a rinawm a, performer tam tak zinga mi rilru hnehtu pawl tak pawh a ni ngei ang.

The Rolling Stones chuan 'You Can't Always Get What You Want' an sa a, Zoom hmang ṭangkaiin Mick Jagger-in acoustic nena a bulṭan chu Keith Richards, Ronnie Wood leh Charlie Watts-te chuan an lo zawm ve leh a ni.

Stevie Wonder chuan March 30-a kum 81 mi nia thi ta, Bill Withers zahna hlanna ni pah fawmin Withers hla hit 'Lean on Me' a sa.

A sak ṭan hma hian,"Tun ang hun harsa kan tawh mekah hian inṭanpui tawn turin kan awm a ni. Ka ṭhian, fam ta Bill Withers khan tun ang hun atana hla duhthusam a lo phuah a, zanin pawh hian amah hre reng ila ka duh a ni," tia sawiin 'Lean on Me' a sa ta a ni.

Easter sunday-a live stream-a perform lar tak, Andrea Bocelli bakah Celine Dion, John Legend, Lang Lang leh Lady Gaga-te chuan a tawpna atan 'The Prayer' an sa a, mi rilru a hneh hle tih a chiang.

Hun harsa tawpkhawkah chuan ṭawngṭaina bakah Pathian zahngaihna leh humhimna kan mamawh zia he hla an sak hmang hian a chiang awm e. Celine Dion leh Andrea Bocelli-te'n an lo sak lar tawh hla hmanga Concert an khar hi a inhmeh hle a ni.