Kolasib leh Hnahthial Miss a hriat ta

Mizoram Journalist Asso­ciation (MJA) leh Zonet ṭang­kawpin an buatsaih Miss Mizo­ram 2020 thlana chu neih ṭan niin nimin khan Kolasib leh Hnahthial chuan an district aiawh tur an thlang fel.

Miss Mizoram 2020 Kolasib District hi nimin khan Press Club, Kolasib-ah Sangchhin Chinzah, Deputy Commissioner, Kolasib District chuan a puang a, Kolasib District aiawh tur hian Ruthi Lalrinfeli Khiangte, Bangla Veng, Vairengte chu thlan a ni. Ruthi Lalrinfeli Khiangte hi kum 19 mi a ni a, Guwahati College-ah BA 6th semester a zir mek bawk. 

MJA Hnahthial chuan an district aiawh thlanna hi KVK training Hall, Hnahthialah neiin Vanlalmawia, Hnahthial District Deputy Commissioner chu khuallian niin a hmanpui. Hnahthial District aiawh tur hian Mapui Lalhnaihzuali chu an thlangin, Hnahthial District  Miss hmasaberah an puang bawk. Vanlalmawia hian Mapui Lalhnaihzuali hnenah hian Citation leh Rs 10,000 a hlan a ni. Kum 20 mi a ni a, Ft 5.8-a sang niin, Women's College Agartala, Tripura-ah B.Sc 2nd Semester a zir mek a ni.