Vulmawi Kum 40 a tling dawn ta

Mizo band zinga chuai thei lo, tun thlenga hla lar la nei thei, Vulmawi chuan kum 40 an lo tling dawn ta reng mai a, kum 40 an tlin lawmna hi ropui takin November 17 leh 18, 2016 khian Tahan, Myanmar-ah neih a ni ang.

Kum 1976-a din Vulmawi hi an hunlaia Mizo ṭhalai leh Mizoram pum ngaihsan an ni a, tunah erawh member an awm darh ta hle. Tawneng chu Switzerland-ah a awm a, Lalruanga hi USA-ah awmin, Hmingliana hi Yangoon-ah a awm. Buta leh Siama te unau erawh Aizawlah an awm thung. An member pali lai maiin mual an liam tawh a, an drummer Zothana te, an bassist Th‚wngnova te, (Rihlipui) Nghaka leh an drummer pakhat dang Zara te an awm tawh lo. Member la damte hi an band kum 40 tlin lawmnaah hian tel vek an tum a, stage-a zaiho leh turin an inpuahchah mek.

Vulmawiin kum 40 a tlin lawmna tura sum tuak nan Vulmawi hian November 5, Inrinni zan dar 8-ah Hotel Floria Rooftop-ah Vulmawi Nite a buatsaih dawn a, hetah hian Siama leh Buta te an zai ang. Chu bakah chuan tunlaia zaithiam lar tak tak thlan chhuah mi 10 ten Vulmawi hla hrang hrang an sa dawn. Zaithiam thlan chhuahte zingah hian Israela, DJ Lalvenhimi, Zorinzuali, Rachel Lalnunkimi, F. Zomuanpuia, OPA (Tribal Power), Lalruatfeli (Triau Trackx) te an tel a, live music-a rem vek a ni dawn a, seat 150 chauh siam a ni a, entre fee hi Rs. 1000 a ni.

Kum 1976-a Tahan-a band indin Vulmawi hian an hlawhtling chho hlein, Zofate chênna chin ram an al hneh hle ang tih an ring pha bik hauh lo ang. Sum nei mang loa indin chho ve kha an ni a, an inzirna pawh ṭingṭang pangngai leh herhsawp khawn rik mai mai khan Mandalay-a Myo Thant Studio-a a hunlai guitar ṭha ber ber leh drums
ṭha ber ber an han hma­chhawn a, sum neih loh nen, Raldawna leh Tum­chhingi album an pum ve hram; an album hmasa ber a ni. Raldawna leh Tum­chhingi album hi November 18, 1976 khan an record ṭan a, he ni hi tuna Ruby Jubilee an lawm tur ni atan an hmang dawn. He album-ah hian hla 14 a awm a, he album-a hla lar tak pakhat chu 'Ka nuam ve e' tih kha a ni.

Kum 1981 khan hmanraw ṭha zawk leh changkang zawk an khawih pha tawh a, sum leh paiah pawh an lo ziaawm ta deuh bawk a, Rangoon-a Oasis Studio-ah kum 1981 September thla khan an album pahnihna 'Parmawi rimtui' album kha an buatsaih a, he album zet hi chu phûng zinga piring vawrh ang tluk zetin Zoram khawvel­ah hralh a kal a, a hlawh­tling. Hla 14 tho a awm a, tunhnaia Israel Lalbiakrema rawn sak lar thar leh 'Sawi­selbovi' tih pawh hi Side B lama hla parukna a ni a, a hmaa a lo sak tawh tho 'Chhing­khual di' pawh kha he album Side A lama mi a ni.

Kum 1982 khan 'Kawl a êng ṭan ta' album tihchhuah a ni leh a, May Studio, Rangoon-a record a ni. Hei pawh hi a hlawhtling hle. Vulmawi album hnu­hnung ber a ni. Hla 15 a awm a, he album-a hla awm zing­a tun thlenga la lar chu Maphasy kha a ni a, Side B lama awm a ni.