AMA-ah Sting hnenah mibik award
November thlaa sem tur, American Music Awards-ah hian Sting chu mibik chawimawina award, 2016 American Music Award of Merit hlan a ni dawn.
American Music Award of Merit hi music industry-a mi thawhhlawkte hnenah hlan a ni ṭhin a, Michael Jackson te, Prince te, Frank Sinatra te, Janet Jackson leh Paul McCartney te hnenah hlan a lo ni tawh. American Music Awards hi November 20 khian Los Angeles-a Microsoft Theatre-ah sem a ni ang.
Sting hi tunah hian kum 65 mi a ni tawh a, he chawimawina a dawn lawm nan hian American Music Awards-ah a zai nghal dawn a, a hla chi hrang hrang a medley dawn a, chung a medley tur zingah chuan 'I can't stop thinking about you' hla pawh a tel. Chawimawina a dawn d‚wn avang hian music a chawlhsan ta emaw a ni lo a, tunah hian Sting hian music album thar tichhuak turin a inpuahchah mek. Sting album thar tur hi 57th & 9th a ni. The Police-a an frontman hian kum 13 hnuah rock album a tihchhuah vawi khatna tur a ni dawn a, a fan-te pawhin an nghakhlel hle.