Paul Beatty-a'n Man Booker Prize a dawng

Sap ṭawng hmanna khawvela lehkhabu ziak lama chawimawina ngaih ropui ber, Man Booker Prize puan a ni a, a dawngtu chu Paul Beatty a ni a, a lehkhabu hming chu 'The Sellout' a ni.

Jury te chuan The Sellout lekhabu hi an fak hle a, elsenna thu hmanga Los Angeles khaw tarlanna lehkhabu ngaihnawm tak a ni an ti. Elsenna ṭawngkam hmang hian Paul Beatty hian Sellout-ah hian Los Angeles-a chi leh hnam hrang hrangte chungchang a tarlang a, Man Booker Prize hi Prince Charles nupui, Camilla chuan a hlan.

Man Booker Prize dawngtute hian pawisa fai, £ 52,500 (USD 64,100) an dawng a, mahse hei hi chu he lawmman dawngtu an puan aṭanga lehkhabu an hralh belh leh aṭanga chhut chuan a tlÍm tham hle. Man Booker Prize dawngtu an puan chiah hian khawvel pumah an dawnna lehkhabu hi nasa takin a hralh a kal leh phah a ni.

'The Sellout' hi Paul Beatty novel palina a ni a, he lehkhabu hmang tho hian a hmain National Book Critics Circle Award an lo hlan tawh a ni. He lehkhabuah hian African-American pakhat, Bonbon-a, Los Angeles venghnuai, Dickens-a cheng chanchin tarlan a ni a, tualchhung high school pakhata sal neih leh chi inthliarna tihthar leh tum ang puh a nih thu a ni.

Man Booker Prize for Fiction hi Sap ṭawnga ziak lehkhabu, UK-a publish-te hnena chawimawina an hlan a ni. July thla khan he prize dawng thei tur Long List tihchhuah a ni a, hemi aṭang hian an thlifim a, September thla khan shortlist an tichhuak leh a, chutah chuan Paul Beatty 'The Sellout', Deborah Levy 'Hot Milk', Graeme Macrae Burnet 'His Bloody Project', Ottessa Moshfegh 'Eileen', David Szalay 'All That Man Is', leh Madeleine Thien 'Do Not Say We Have Nothing' te an tel a, heta ṭang hian Man Booker Prize dawng tur hi an thlang chhuak ta a ni.

Man Booker Prize hi kum 1969 aṭanga sem kha a ni a, India mi zingah Arundhati Roy 'The God of Small Things', Kiran Desai 'The Inheritance of Loss' leh Aravind Adiga 'The White Tiger' te chuan an lo dawng tawh. US mi zinga Paul Beatty hian he chawimawina hi a dawng hmasa ber

Paul Beatty

Kum 1962 khan Los Angeles-ah a piang

American zinga Booker Prize dawng hmasa ber a ni

A novel hmasa ber chu kum 1996-a a tihchhuah The White Boy Shuffle kha a ni

Novel pali a ziak tawh - The White Boy Shuffle, Tuff, Slumberland leh The Sellout