One World: Together at Home $mtd 127.9 hmu chhuak

Lady Gaga hmalaknaa Inrinni zana neih tak, World Health Organisation leh Global Citizen-te nen ṭang­kawpa 'One World: Together at Home' concert chuan coronavirus relief fund atan $maktaduai 127.9 lai a lalut.

Darkar hnih chhung concert (preshow nen chuan darkar riat) hian ngaihhlut a hlawh a, sum pawh a la­­lut hnem rem rem hle. Gaga chuan he concert hi 'smile' hmangin a kick off a, sum khawnna programme a nih loh thu leh hripui donaa hmatawng healthcare worker-te hnena lawmthu sawina a nih thu sawi mah se sum hi a hailut hnem hle tho a ni.

One World: Together at Home concert-ah hian preshow nen phei chuan milar 70 chuang an inlan a, sum khawnna event ni lo mah se thlirtute rilruah a tlana hle a niang; Global Citizen hotute chuan $mtd 127.9 lai hmuhchhuah a nih tho tih hi an tarlang chiang tawh.

Thuchhuah an siamah Gaga chu lawmthu hrilhin global broadcasting event chhinchhiah tlak tak siamna kawnga Global Citizen a pui chu an lawm hle tih an tarlang.

He concert-ah hian zai­thiam inlan pawh an hrawl hle a, Stevie Wonder, Paul McCartney, Elton John, Lizzo, leh Taylor Swift-te pawh inlan zingah an tel a ni.

One World: Together at Home concert hi mi maktaduai 14.6 vel laiin an thlir niin an chhut a, Gaga hian a hmain hemi pual hian $mtd 50 vel lai chu a hmuchhuak tawh bawk.