RHCP-a let hi Fruciante hian a phu a ni: Klinghoffer
Nikum kum tawpah khan Red Hot Chili Peppers chuan an guitarist lungdum ber, an fapa tlanbo John Frusciante a lo let leh tih an puang a, hetihrual hian kum 10 zet an zinga khawsa, Frusciante thlan zo ber Josh Klinghoffer chuan an band a chhuahsan a ngai thung.
Marc Maron WTF podcast-in a kawmnaah Klinghoffer chuan enhran bik nia a inhriat loh thu leh Fruciante chuan RHCP-a let leh chu a phu hle tih a sawi. "Thutlukna siam awlsam tak a ni. Band-a awm kha John-a awmna hmun tur tak a ni. Chuvang chuan ka lawmpui a, an zinga a tel leh ta kha ka lawmpui hle a ni," a ti.
Flea nen an lo jam reng tawh
Josh Klinghoffer chuan Flea leh John chu thla eng emaw zat chu an jam dun leh tawh tih a hriat thu a sawi a, chumi avang chuan an band-a alet leh pawh chuan ṭhawng hle mah se mak a ti hran lo tih a sawi. RHCP chuan album thar an buaipui leh ṭan tih sawiin, hlate pawh an phuah hman a, mahse engmah an la record lo tih a sawi bawk a ni.
"Kum nga kal ta kha chu nise John lo let leh hian min ti hrehawm hle ang. Mahse kum 10 a liam tawh a, tour pahnih leh album pathum dawnah kan thawk ho hman a, ka inchhuang hle a ni," a ti. Frusciante chhuah hma pawh khan Klinghoffer hian RHCP hi a zui reng tawh a, back up musician niin an perform-na tam takah a pui a ni.