Evanescence album thar kumin chhung ngeiin

Evanescence chuan kumin chhung ngeiin album an tichhuak dawn tih an sawi.

Amy Lee chuan social media-ah engti kawng zawng pawhin kumin chhung chuan album an tichhuak dawn tih sawiin, April 24 hian an album thar tur single hmasa ber tihchhuah an tum a, an album art pawh an tilang tawh bawk.

An album thar tur hi 'The Bitter Truth' tih a ni a, Amy Lee chuan,"Kum 2020-ah album thar tihchhuah kan tiam che u a, engmah kan indan tir dawn lo. Kan album thar ‘THE BITTER TRUTH’ chungchang kan 'share' ṭan tur che u hi kan inchhuang hle a, a mal te tein kan tichhuak dawn a, ZIRTAWPNI lo awm turah hian kan hla hmasa ber 'Wasted On You' chu kan tichhuak ang! 'Wasted On You' PRE-SAVE zinga mi 50 kan thlang chhuak anga, chung mite chuan Zoom call hmangin Ningani lo awm turah hian Amy Lee hoin an ngaithla ang," tiin a sawi.

Lee hian Loudwire hnenah an album thar tura hlate chu a hrang nuaih dawn tih lo sawi tawhin thil hrang hrang zawmkhawm a ni dawn tih a lo sawi tawh a ni.

Mi tam takin an hriat chak em em Evanescence an hriat ṭhin ang kha an la ni dawn em tia mi rilrua zawhna awm pawh lo chhang tawhin Amy Lee chuan Evanescence kan hriat ṭhin ang ngei kha an la nih dawn thu a sawi tawh.

An album thar tur chungchang hi chiang takin Lee hian a la sawi lang duh lo a, eng nge an 'theme' ni dawna, an hlate chu eng lam nge a nih dawn tih pawh a la sawi lang duh lo thung. Mahse a nuna thil thleng hrang hrang behchhan hlate a ni dawn hlawm tih erawh a sawi thung. Evanescence fan-te tan chuan album tlangzarh hun hi dawhthei taka nghah a ngai rih dawn a, mahse Zirtawpni hian 'The Bitter Truth' hi a tem chhin theih dawn thung a ni.