Zaninah Praise On result an puang tawh dawn

Synfo leh Inkspot Digital Solution te buatsaih Praise On chu a hmawr an bawk dawn hnai ta a, Thawhlehni zan leh nizanah te Top 10 intihsiak a awm hnuah zanin hian result puan a ni tawh dawn.

Praise On hi Lung≠lei, Serchhip, Champhai, Mamit, Kolasib leh Aizawl-ah te elimination round buatsaih a nih hnuah mi 254 ten Second Round an thleng a, heta aṭang hian Top 50 thlan chhuah a ni a, Top 50 aṭangin Top 10 thlan chhuah leh niin, Top 10 aṭang hian result puan a ni tawh dawn a ni.

Ningani zan khan intihsiakna ṭum hnihna neih a ni a, hetah hian top 10-te - Lalfamkima, Dawrpui Vengthar; Saitluangpuii Sailo, Zemabawk N; R. Lalrinmawii, Leitan; Zorinsanga Sailo, Ramhlun N; Lalrinawm≠i Sailo, Electric Veng; Lalhmangaihzuali, Kulikawn; Loncy Lianchungnunga, Laipuitlang; Lalruatfeli, Lunglei Chanmari; Cindy Lalthanpuii, Tlangnuam leh Lalrin≠chhana Jongte, Kulikawn Hmunthar te an intihsiak.

Zanin hian Central KṬP Leader, Rev. Zothansanga'n ṭanna hun a hmang ang a, Mizoram Synod Choir an zai ang. Hei bakah hian Top 50 zinga mi pahnih an zai ang a, Praise On-a pakhatna a zai bawk ang. Rev. PC Pachhunga, Executive Secretary i/c MSSU, etc chuan special award a hlan ang a, result an puang ang a, Rev. H. Lalrinmawia, Synod Moderator chuan lawmman a sem ang. Zan≠in result puan hi a duh apiang tan chhim theih a ni ang.

Praise On-ah hian judge pathum an awm a, Vanlalvuana, Tekawka leh Liandingpuii te judge an ni a, Top 10-te hi team pathumah ṭhenin team tin hian mentor pathum ṭheuh an nei. Mentor-te hi Team 1-ah K. Lalbiakthanga, Stacy VL Muanpuii, leh David Lalvensanga te an ni. Team 2-ah Manase H. Saphmingthanga, Vanlalpari, leh Lalhriatchama te an ni a, Team 3-ah hian Dr. Zothansanga, Baby Malsawmtluangi leh R. Lalmalsawma mentor an ni. Praise On result puan hi Hruaina ng channel, LPS leh Zonet-ah te live-a pek chhuah a ni ang.