Grammy Awards velah Kanye West a phunnawi leh ṭan

Phunnawi ching Kanye West chuan a mize pangngai a chhuah leh a, Grammy Awards-ah a duh ang mi an nominate loh chuan a kal dawn lo tih a sawi.

Grammy Awards sem hmasakah te, MTV VMA-ah te pawh sawi hat tling khawpa lo phunchiar tawh Kanye West hian nakkuma Grammy Awards sem hunah Frank Ocean nominate a nih loh chuan a kal loh tur thu a sawi chhuak.

Kum 2009 khan MTV VMA semnaah Beyonce-i'n Best Female Video la se a duh em em laiin Taylor Swift-i'n a la ta zawk si a, Kanye West hian hemi ṭum hian huaikawm a bawl. Stage-a Taylor Swift a din laiin a chho a, a microphone a laksak a, Taylor Swift ai chuan Beyonce-i'n la se a inphu zawk turzia a sawi vak a nih kha.

Inrinnia Oakland-a a concert-ah Frank Ocean chungchang hi Kanye West chuan sawi chhuakin, "Kumin chhunga ka hla ngaihthlak deuh ber chu Frank Ocean-a hlate a ni. A album hi Grammy-a category a eng emaw bera nominate a nih loh chuan Grammy Awards-ah ka inlan lo ang," a ti. Frank Ocean album pahnih 'Blonde' leh 'Endless' te chu nakkuma Grammy sem hun atana thlir theih hun chhunga tihchhuah ve ve a ni.